Ao final a climatoloxía foi benevolente e a chuvia respectou as máis de seis horas de espectáculo que durou este venres a oitava edición da Gala contra o Cancro de Panorama. Nin sequera os intermitentes chuvascos arredraron ao público e finalmente a gala demostrou un ano máis o seu tremendo poder de convocatoria.
Segundo a organización foron 18.000 as persoas que se congregaron no recinto feiral de Vilagarcía para gozar do que xa é considerado como o espectáculo anual máis grande de cantos se celebran no noroeste peninsular.
Ás 23.30 horas comezou a soar a música, en tanto que dende o exterior aínda seguía entrando público.
As primeiras filas estaban ocupadas por unha lexión de fans que enarboraban todo tipo de pancartas e bandeiras alusivas principalmente a Auryn e Gemeliers, os dous grupos xuvenís con maior tirón no mercado español.
David Bustamante, India Martínez, Pablo López, Luis Fonsi, Soraya, DKB, Danny Romero e un convidado de última hora que non figuraba no cartel: King África que non quixo perderse a celebración e lle puxo unha nota festiva e aínda máis de cor ao tramo final da gala de Panorama.
Tras catro horas de espectáculo no escenario principal, a música trasladouse despois a un segundo escenario no que recoñecidos dj's ofreceron unha sesión de música de baile ata as seis da madrugada.
Os responsables da Orquestra Panorama valoran de forma moi positiva o resultado da gala de onte, tanto pola afluencia de público coma polo nivel artístico alcanzado e polo feito de que se desenvolvese nun ambiente festivo e sen ter que lamentar incidentes.