A gala anual da Fundación Galega contra o Narcotráfico celebrábase este venres no Auditorio de Vilagarcía de Arousa coa presenza de Diego Calvo, vicepresidente segundo e conselleiro de Presidencia, Xustiza e Deportes, acompañado do director xeral de Xustiza, José Tronchoni.
A vixésima edición da gala converteuse no escenario da entrega dos premios Nécora de Ouro, cos que se recoñece o labor de persoas e entidades que loitan contra o tráfico de drogas.
O premiado nesta edición foi Antonio Duarte, xefe da Brigada Central de Estupefacientes da Policía Nacional. Tamén recollían o galardón o xornalista José Antonio Pérez Docampo e a Sociedade Europea para a Investigación en Prevención.
Durante o acto, Manuel Couceiro, presidente da Fundación, alertou sobre a escalada do narcotráfico durante os últimos tempos en Galicia lembrando o descubrimento do laboratorio de elaboración de cocaína situado en Cerdedo-Cotobade ou diversas operacións policiais desenvolvidas nas Rías Baixas.