O día grande da Feira Franca comezou este sábado de xeito formal ás 11.30 horas coa apertura do mercado medieval na avenida de Santa María e a mostra de oficios tradicionais nas prazas da Pedreira, A Ferraría e O Peirao, dúas das citas fundamentais que contribúen a que o ambiente que se respira en Pontevedra durante esta fin de semana sexa o do século XV.
Canteiros, ferreiros, palilleiras, cesteiros, oleiros, redeiras e carpinteiros amosan polas prazas da cidade como traballaban seis séculos atrás e, con músicos, xograres, campesiños, toneleiros, artistas, comerciantes, damas e cabaleiros, trasladan á poboación a aquel 1467 no que o rei Henrique IV concedeu á cidade o privilexio dun mercado libre de impostos dun mes de duración.