A investigación do crime no que en novembro de 2015 Marcos Vidal González confesou matar a puñaladas ao marido da súa ex noiva, Manuel Ángel Rivas, deu un xiro xudicial. A Audiencia Provincial de Pontevedra estimou a petición da familia do falecido e acordou que Sandra Martínez Araujo tamén debe estar investigada por estes feitos e declarar de novo como tal no xulgado.
O auto da Sección Cuarta da Audiencia Provincial, adiantado por La Voz de Galicia e ao que tivo acceso PontevedraViva, acorda ampliar a imputación por estes feitos e dirixila tamén contra a esposa do falecido e ex parella do ata agora único investigado ao considerar que a "credibilidade" da moza está en cuestión e que nas súas declaracións tivo "omisións e inexactitudes".
O coñecido como crime de Ponte Caldelas conmocionou esta localidade pontevedresa hai pouco máis de dous anos polo dramatismo de todo o que rodeaba o caso. O falecido e a súa esposa deixaran presuntamente a súa relación e ela empezara unha nova co presunto asasino. Falecido e sospeitoso eran, ademais, compañeiros de negocio na localidade de Arcade (Soutomaior), Marcos Vidal tiña unha barbería e Manuel Rivas unha tenda de embutidos pegada.
Marcos Vidal confesou o crime e atópase en prisión preventiva desde entón, pero a familia do falecido sempre tivo unha sospeita sobre a implicación doutra persoa nestes feitos e pediu en reiteradas ocaciones no Xulgado de Instrución número 1 de Pontevedra que levaba o caso que investigase a Sandra Martínez. O xulgado sempre se negou, de modo que finalmente recorreu á Audiencia. O tribunal provincial, con este novo auto, estima o seu recurso e revoga a decisión da xuíza instrutora.
A xuíza instrutora rexeitara ampliar a imputación fronte a Sandra Martínez Araujo, pero a Audiencia considera que neste caso, "cos datos que constan", a decisión é "precipitada", pois se viu "cuestionada a credibilidade" da moza "tendo en conta das omisións e inexactitudes que se colixen das súas declaracións en contraste coas dilixencias de investigación ata a data practicadas".
A Audiencia considera que se fai necesario realizar outras dilixencias de investigación que axuden ao total esclarecemento dos feitos e, fundamentalmente, que permitan afirmar ou descartar con taxatividade a participación de Sandra no crime ou en calquera outro feito relacionado co mesmo.
O auto fundamenta a súa decisión en que, neste momento procesual do caso, e no estado da investigación, "non pode caer en saco roto a falta de claridade, inconcreción e, mesmo, a falta de verdade de Sandra" en feitos tan elocuentes como é o que viñera mantendo unha dobre relación sentimental co seu esposo e co investigado.
Sandra declarou nas súas declaracións no xulgado que o seu esposo falecido sabía que Marcos a sometía a un "situación de acoso e de ameaza" e non lle daba importancia, pero a Audiencia insiste en que non poden "resultar cribles" estas afirmacións. Ademais, sinala que tal versión dos feitos entra en "aberta contradición" coa preocupación e medidas de precaución que Manuel parece ser que tomaba ao saír do domicilio e que, parece ser, comunicaba á propia Sandra cun "ok".
A muller vai ser citada a declarar en calidade de investigada por estes feitos e nesa declaración, segundo a Audiencia, debe dar resposta, entre outros, a extremos tan importantes como ao que alude a propia instrutora relativo ás razóns polas cales chamou ao 112 antes de que Marcos lle dixese que o seu marido estaba a agonizar e de que lle enviase a foto que mostraba o estado da vítima. Só poderá declarar sobre estes aspectos en calidade de investigada a fin de salvagardar todos os seus dereitos.
Ademais de citar a Sandra como investigada, a Audiencia acorda que se debe "proceder á práctica de cantas dilixencias de investigación considérense necesarias" para o "total esclarecemento dos feitos".