Pontevedra será a cidade que acolla a edición número 57 da convención de directivos da Dirección General de Tráfico (DGT), que reunirá a toda a súa cúpula no Hotel Galicia Palace entre os días 29 de novembro e 1 de decembro.
Co seu director xeral, Pere Navarro, á cabeza, o congreso contará con todos os responsables provinciais de Tráfico e nel, segundo avanzou o alcalde de Pontevedra, Miguel Anxo Fernández Lores, decidiranse as novas directrices en seguridade viaria.
Fernández Lores sinalou que "faime especial ilusión" que a cidade de Pontevedra vaia a acoller esta convención estatal, porque a DGT "foi un organismo que nos acompañou sempre e nos axudou a desenvolver o noso modelo".
Tráfico sempre recibiu as ideas que achegaba Pontevedra "coas portas abertas" e mantivo esta relación directa "con independencia" de quen presidía este organismo.
A este respecto, subliñou especialmente o seu apoio á decisión de que Pontevedra se convertera en 2011 na primeira cidade española en declararse como "cidade 30".
O Concello, segundo avanzou o alcalde, estará presente na inauguración desta convención, da que non adiantou o seu contido ao entender que corresponde á propia DGT trasladar os asuntos que abordará na súa reunión en Pontevedra.
"É onde se debaterán os temas de por onde se van a mover as liñas da seguridade vial en todo o Estado", limitouse a subliñar o rexedor pontevedrés.