O presidente da Deputación de Pontevedra, Luis López, informou este venres en rolda de prensa dos asuntos abordados na Xunta de Goberno Provincial celebrada esta mañá e na que se mobilizaron preto de 4 millóns de euros.
Entre os asuntos aprobados atópase o novo programa "Lecer en familia" ao que se destina 179.000 euros e que busca "reforzar os lazos familiares nun ambiente de convivencia" a través de estancias de fins de semana en establecementos hostaleiros da provincia.
En total serán 2.350 prazas para gozar de fins de semana en balnearios, talasos, spa ou establecementos similares da provincia con aloxamentos dunha noite en réxime de media pensión para unidades familiares con, polo menos, un menor ao seu cargo. Subvencionarase con 75 euros do custo total para maiores de 16 anos, con 50 euros para menores de 4 a 16 anos e gratuítas para os menores de 4 anos.
"O obxectivo final é desconectar do estrés diario e gozar dun lecer de calidade en familia, reactivando emocións positivas con actividades e o fomento da diversión compartida", explicou o presidente da Deputación de Pontevedra. Ademais, pretende ser un programa dinamizador da economía da provincia que impulse ao sector turístico en tempada baixa, é dicir, entre o 15 de setembro e o 15 de decembro.
Está previsto que estas bases publíquense no mes de agosto. Mentres tanto a Deputación contratará á empresa que o desenvolva.
Luis López tamén deu conta da aprobación do expediente para contratar o servizo de execución do programa Máis Benestar, que ofertará 2.127 prazas para maiores de 55 anos para acceder a balnearios, talasos ou spas da provincia. O orzamento é de 881.960 euros, dos que a Deputación financia 221.700 euros. En concreto, subvenciona 2.097 prazas en réxime xeral con 100 euros e case 30 prazas de réxime especial con 400 euros. Os usuarios beneficiarios pagarán o importe restante.
MARISQUEO
O goberno provincial tamén aprobou este venres a liña de subvencións para as confrarías de pescadores, as federacións de confrarías e as agrupacións de mariscadoras, que repartirán 250.000 euros para afrontar gasto corrente e investimentos.
Estas axudas para financiar gasto corrente supoñen unha novidade con respecto a outros anos. Son 175.000 euros para atender "un clamor que nos trasladou o sector", explicou Luis López, "ante a singularidade e as dificultades deste ano" e aquí inclúense os gastos de combustible e electricidade, gastos de persoal ou mesmo a adquisición de semente de moluscos bivalvos. O resto, 75.000 euros, poderán destinalo para investimento.
DEPORTE
A Deputación de Pontevedra tamén acordou este venres destinar 780.000 euros ao fomento do deporte.
Así, o Concello de Tui recibirá 105.000 euros para obras de substitución da cuberta e para mellora da ventilación da posta deportiva de Randufe e o Concello de Vilagarcía recibirá 176.000 euros para a reposición do céspede artificial no campo de Berdón.
Neste capítulo a contía máis destacada son os 500.000 euros aprobados para que clubs deportivos e federacións poidan organizar competicións ou eventos deportivos na provincia.
En concreto, destínanse 300.000 euros para a realización de competicións deportivas federadas oficiais de ámbito estatal ou internacional, é dicir, campionatos ou copas de España ou do Mundo e competicións deportivas oficiais de alto nivel. Para a realización de competicións deportivas oficiais e non oficiais de todos os ámbitos territoriais, non incluídas no apartado anterior serán os outros 200.000 euros en axudas.
Luis López explicou que tamén se poderán subvencionar gastos federativos de viaxe, de organización, publicitarios, sanitarios ou de material e premios.
O presidente da Deputación lembrou que "Vilagarcía é o Concello que máis se beneficiou do Plan de Infraestruturas deportivas, con máis de 200.000 euros".
PLAN +PROVINCIA
Por último, o presidente da Deputación de Pontevedra deu conta da aprobación en Xunta de Goberno de 2,6 millóns de euros para nove concellos da provincia: Agolada, Barro, Bueu, Gondomar, Marín, Meaño, Pontecesures, Sanxenxo e Soutomaior.