Ata 69 contaxios en apenas 24 horas. A covid-19 na área sanitaria de Pontevedra e O Salnés volveu a dispararse e os casos activos aumentaron ata os 537, segundo os datos que recolle o balance diario do Servizo Galego de Saúde. Só Vigo crece máis.
Un total de trinta destes casos activos, seis máis que onte, corresponden a persoas que están hospitalizadas polo coronavirus. Os máis graves son os cinco pacientes que se atopan na unidade de coidados críticos (UCI) de Montecelo. Ata este martes eran catro.
Os outros 25 están a ser atendidos en planta, dezanove en Montecelo, cinco no Hospital do Salnés e un no hospital QuirónSalud Miguel Domínguez de Pontevedra.
O resto dos que contraeron o virus, outras 508 persoas, atópanse illados nos seus domicilios e recuperándose baixo supervisión médica.
Desde o inicio da pandemia 2.193 pacientes da área sanitaria superaron a covid-19, doce máis desde onte, e rexistráronse 26 falecementos asociados ao virus.
En canto á realización de probas PCR, fixéronse na área sanitaria de Pontevedra e O Salnés un total de 55.544, 473 nas últimas horas. Desde onte, detectáronse 66 novos positivos por PCR. A estas probas súmanse as 37.798 seroloxías realizadas ata a data.
A nivel autonómico a Dirección Xeral de Saúde Pública informa que o número de casos activos de coronavirus en Galicia é de 5.457, 238 máis que o día anterior. Deles 905 son da área da Coruña, 518 da de Lugo, 1.494 da de Ourense, 538 da de Pontevedra, 900 da área de Vigo, 851 da de Santiago e 251 da de Ferrol.
Do total de pacientes positivos, 48 están en UCI, 294 en unidades de hospitalización e 5.115 no domicilio. Por agora, en Galicia hai un total de 24.012 persoas curadas, rexistrándose 836 falecementos.
Desde o inicio da pandemia realizáronse en Galicia 602.975 probas PCR e 388.152 probas serolóxicas que, nas últimas 24 horas, permitiron detectar a 441 infectados.