A presión hospitalaria na área sanitaria de Pontevedra e O Salnés segue baixando aos poucos co paso dos días, ao descender a cifra de persoas hospitalizadas positivas no coronavirus Covid-19.
Segundo os datos oficiais ofrecidos este Venres Santo pola Consellería de Sanidade, 62 pacientes permanecen ingresados entre os hospitais de Montecelo, O Salnés (3) e QuirónSalud Miguel Domínguez (1), o que supón 10 menos que 24 horas antes e un descenso de 52 desde o venres da pasada semana, a pesar de que os casos totais de diagnosticados por coronavirus son maiores.
En total na área sanitaria hai 469 casos activos, un menos que o xoves, dos que 407 persoas permanecen nos seus domicilios e 13 evolucionan na Unidade de Coidados Intensivos (UCI), manténdose estable esta última cifra.
Así mesmo non se produciron falecementos asociados ao Covid-19 no último día, mantendo o número de defuncións en 11, mentres que as altas hospitalarias excederon por primeira vez a barreira do centenar con 11 novas altas tramitadas para un total de 108 pacientes curados.
A nivel autonómico a Dirección Xeral de Saúde Pública informa que, na última actualización, o número de casos de coronavirus en Galicia ascende a 5.631 (+80), dos que 1.151 son da área da Coruña, 571 da de Lugo, 1.082 da de Ourense, 1.074 da área de Vigo, 963 da de Santiago, e 321 da de Ferrol.
Do total de pacientes positivos, 149 permanecen en UCI, 766 están en unidades de hospitalización e 4.716 no domicilio. Por agora, en Galicia rexistráronse 997 altas de pacientes e 318 falecementos.
O número de PCR realizadas é de 39.432.
A Consellería de Sanidade reitera que a cidadanía empregue o número 061 só para emerxencias ou casos graves e aconsella utilizar o número gratuíto do 900 400 116 para consultar dúbidas ou síntomas leves de coronavirus.
O Sergas ten ao dispor da cidadanía unha páxina web (https://coronavirus.sergas.es), na que se pode consultar información dirixida á poboación, aos profesionais sanitarios e a outros colectivos.