"A droga aprópiase das rúas das cidades ante a falta de axentes para previr esta lacra e unidades para investigar esta actividade ilícita". Así llo transmitiron membros da Confederación Española de Policía (CEP) de Pontevedra ao subdelegado do Goberno en Pontevedra, Abel Losada.
Foi nun encontro de carácter institucional no que os representantes sindicais lle trasladaron ao subdelegado as problemáticas e necesidades dos axentes destinados na provincia e informaron das principais reivindicacións da asociación.
Participaron en representación da CEP o secretario rexional, Agustín Vigo, o secretario provincial, Carlos Rodríguez, o secretario de comunicación, Javier Martínez, e o responsable de prevención de riscos en Galicia, Javier Álvarez.
Agustín Vigo sinalou a situación anómala que viven as forzas e corpos de seguridade en España, "durante 2023 sufrimos 16.560 agresións, ou o que é o mesmo, 46 agresións diarias, moitas delas motivadas pola deterioración da figura de axente de autoridade, e sen contar a súa profesión coa cualificación de profesión de risco".
Por iso é polo que solicitan que se apliquen "co máximo rigor e dureza posible" as sancións derivadas das condutas sancionadas pola Lei de Seguridade Cidadá
"Non buscamos medo, buscamos respecto e que toda conduta impropia dirixida cara a un policía sexa castigada con dureza, e sabemos do poder educador que ten o ter que ‘rascarse o peto’ por non cumprir coa lexislación, aseguran.
Desde a organización sindical deron a coñecer a "situación real e anómala" pola cal atravesa o colectivo de policías nacionais nas comisarías da provincia de Pontevedra, onde "se están dando circunstancias graves e que necesitan de cambios urxentes", apuntando que nas cidades da provincia "está a vivirse un aumento da delincuencia autora de delitos graves e violentos da que nunca antes tiveron precedentes".
"Cada día menos coches patrullan as rúas das nosas cidades, e un motivo diso é a falta de policías", alertou Carlos Rodríguez.
A estatística do Ministerio do interior reflicte o aumento dos delitos graves, onde destacan excesivamente os homicidios, delitos contra a liberdade sexual e roubos, e desde a CEP achacan ao aumento da delincuencia violenta ao aumento da droga na rúa, onde aos consumidores habituais sumáronselle novos consumidores, "o que fixo proliferar numerosos puntos de venda de droga nun mercado asolagado pola cocaína e heroína, con prezos un 33% máis baixos que hai 20 anos, no ano 97 un quilo de cocaína custaba 30.000 euros e hoxe día os delincuentes cómprano por 20.000 euros".
Segundo sinalaron, isto é consecuencia dun déficit de persoal policial dun 15% nas comisarías, "hai máis policías que nunca, pero estas cifras non son reais, e é que moitos dos axentes que nelas traballan pasaron a realizar traballos administrativos".
A isto úneselle que cos mesmos cadros de persoal tiveron que facer fronte a novas tipoloxías delituosas, como é o caso de potenciar grupos de investigación contra a delincuencia económica ou de roubos en domicilios, pola actuación de bandas organizadas, polo que se retraeron policías de grupos de investigación xa existentes, como é o caso dos grupos de represión do tráfico de drogas.
Lembraron que na cidade de Pontevedra ata hai poucos anos había tres grupos de investigación nesta materia e actualmente só hai dous.
"A nosa comunidade padece un aumento a cotas non coñecidas do narcotráfico, principal causa do aumento de todos os delitos graves e que financia o terrorismo, trata de seres humanos, tráfico de armas, crime organizado, e un longo etc. que padecen os cidadáns das nosas urbes, as nosas familias e os policías, volvéndose estes últimos a diana dos violentos", denuncia Agustín Vigo.
Por todo isto, solicitan con carácter urxente a adecuación dos catálogos de postos de traballo de cada comisaría á realidade delincuencial actual e ao volume de traballo de cada persoal, o que supoñería a catalogación de numerosos postos de traballo que se desempeñan e que sobre o papel non existen, e a ampliación dos persoal das brigadas de xudicial e seguridade cidadá, para poder facer fronte ás investigacións que se xeren e poder ter na rúa os efectivos policiais necesarios para facer un labor preventiva real.
Así mesmo, remarcan a necesidade de promover a finalización de diferentes proxectos, como son a creación dunha Unidade de Prevención e Reacción e a construción dunha nova comisaría na cidade de Pontevedra ou a potenciación dos grupos de investigación, entre eles, os dedicados a loitar contra o narcotráfico.
BOLARDOS
Por outra banda, neste encontro os representantes do sindicato policial solicitaron que desde a Subdelegación insten o Ministerio do Interior para elaborar un informe xurídico sobre os bolardos e maceteiros instalados na rúas da cidade de Pontevedra e se a súa instalación vai contra a lexislación vixente por impedir o labor dos servizos de emerxencia iníciese canto antes o procedemento xudicial adecuado para obrigar á súa retirada.