Desde o pasado día 5 e ata o próximo 20 de outubro ao redor de 2.500 militares están a participar no Exercicio Gamma Azor 23.
Neste exercicio despregáronse ao redor de 400 vehículos, tanto de combate como de apoio loxístico.
A finalidade principal destas manobras é adestrar aos postos de mando da Brilat e das súas unidades subordinadas no plan e condución de operacións, sendo os aspectos máis importantes poñer a proba a capacidade de mando e control das unidades e a execución de exercicios con fogo real.
Outro aspecto importante é a participación e a integración doutras unidades do ámbito da forza terrestre, para os efectos de aumentar as capacidades operativas da Brilat.
Entre estas capacidades, cabe destacar a participación de 5 helicópteros pertencentes ás forzas aeromóbiles do Exército de Terra (dous helicópteros ataque modelo Tigre e tres de transporte de persoal modelos NH90 e Chinook), unidades de guerra electrónica e unidades de apoio en cooperación cívico-militar.
Así mesmo, o Ministerio de Defensa destaca a participación de persoal británico do 1st Battalion London Guards coa execución do exercicio Iberian Star 23, co obxectivo de poñer en común técnicas, tácticas e procedementos en diferentes capacidades, a interoperabilidade de ambas as unidades e fomentar o coñecemento mutuo entre todos os participantes.