Case un millar de xitanos viven en Pontevedra. Todos eles están hoxe de parabéns. Por primeira vez, con motivo do Día Internacional do Pobo Xitano, a súa bandeira ondea na antiga casa consistorial da Praza de España.
A bandeira azul e verde -que representa o ceo e a terra- coa roda de dezaseis radios en cor vermella, como símbolo da súa tradición nómade, foi pendurada do balcón nun acto simbólico que protagonizaron o alcalde de Pontevedra, Miguel Anxo Fernández Lores, a concelleira de Benestar Social, Carmen Fouces, e representantes da Fundación Secretariado Xitano.
Deste xeito, o Concello de Pontevedra súmase a unha xornada que ten como fin visibilizar a realidade do pobo xitano e a súa cultura e denunciar as situacións de discriminación que enfrontan a cotío, a pesar da súa diversidade e pluralidade.
"Es un día histórico para los gitanos de Pontevedra", sinalaron Rebeca e Miguel Flórez, representantes da fundación, que coincidiron coa súa xente -todos eles visiblemente emocionados- á hora de sinalar que "nos sentimos más pontevedreses que nunca".
Ambos destacaron a importancia que ten este xesto "para la igualdad, el respeto, el reconocimiento y los derechos" do pobo xitano que vive en Pontevedra, principalmente no barrio de Monte Porreiro.
Dende a Fundación Secretariado Xitano traballan para combater a discriminación e a prol da integración, tendo na educación e formación dos máis novos -actualmente hai 75 menores xitanos escolarizados na cidade- e na inserción laboral os seus principais retos.
"En Pontevedra existe la inclusión por el bien de la comunidad gitana", explicou Rebeca Flórez.
A bandeira é, segundo o alcalde, a visualización de que o Concello "é a casa de todos os pontevedreses", sexa cal sexa a súa raza, a súa clase social ou a súa condición sexual.