A 34ª Conferencia anual da Sociedade Europea de Cetáceos (ECS2023) terá lugar no Grove, entre o 16 e o 20 de abril de 2023.
Os organizadores deste evento, o Instituto para o Estudo dos Golfiños Mulares (BDRI, polas siglas de Bottlenose Dolphin Research Institute), aseguran que esta cita será " unha gran oportunidade para volver conectar en persoa despois dos anos de pandemia e falar dos mamíferos mariños, a ciencia, a conservación, coñecer colegas, divertirse e facer novos amigos".
O tema da conferencia é: "Os nosos océanos, o noso futuro. Ecoloxía do comportamento dos mamíferos mariños e uso sostible dos recursos mariños".
Segundo explican desde o BDRI, cando se fala de sustentabilidade e uso responsable dos recursos mariños, é inevitable abordar e recoñecer a importancia dunha mellor comprensión da ecoloxía e o comportamento dos mamíferos mariños e a súa contorna. Apuntan que, do mesmo xeito que os mamíferos mariños, moitas comunidades humanas dependen directa ou indirectamente dos ecosistemas mariños e a súa biodiversidade para a súa subsistencia. Este é o caso de Galicia, onde a pesca e a acuicultura atópanse entre as actividades económicas máis representativas asociadas ao uso dos recursos mariños. A xestión eficaz da conservación da biodiversidade mariña baséase na ciencia. Así mesmo, a conservación dos mamíferos mariños representa un campo de acción fundamental para garantir o equilibrio dos ecosistemas mariños.
"Por tanto, baixo este tema, estamos a convidar á comunidade científica a presentar calquera tema relacionado con cuestións de ciencia e conservación dos mamíferos mariños", sosteñen os responsables do BDRI.
A Conferencia anual da Sociedade Europea de Cetáceos incluirá talleres, que se desenvolverán os días 16 e 17 de abril, e tamén conferencias para os días 18, 19 e 20 de abril de 2023.