896 persoas sen cita acudiron a vacinarse este sábado na área sanitaria

Gratamente sorprendidos estaban este sábado os profesionais sanitarios do equipo de vacinación do Recinto Feiral de Pontevedra. Desde primeira hora da mañá rexistrouse unha afluencia continuada á primeira xornada de vacinación libre na área sanitaria de Pontevedra-O Salnés. Eran persoas maiores de 12 anos que aínda non foran inoculadas. 

Segundo os datos facilitados polo Sergas na área sanitaria de Pontevedra O Salnés foron 896 as persoas vacinadas sen cita e 526 as que tiñan cita. En total 1.422 persoas.

Entre os asistentes a esta primeira xornada de vacinación libre a casuística era de moi variada con incidencias persoais de todo tipo, desde os motivos laborais, viaxes ata o cambio de opinión desde unha inicial negativa a recibir a vacina. O perfil é heteroxéneo neste grupo dos non vacinados no que a media de idade baixa dos 40 anos.

Tampouco son moitas as persoas que están sen vacinar na área sanitaria xa que o 92% dos pontevedreses maiores de 12 anos conta polo menos cunha dose da vacina.

Para o equipo de vacinación foi unha xornada complicada ao non saber a resposta cidadá que ía ter a convocatoria o que impedía controlar o número de doses necesarias duns viais que non deben romper a cadea de frío do soro de Pfizer, que foi o preparado que se administrou onte maioritariamente, e en menor medida o de Moderna.

A área sanitaria de Pontevedra O Salnés xa está inoculando a terceira dose de Moderna, para pacientes inmunodeprimidos.