Do 4 ao 8 de setembro, os trece integrantes da trixésimo primeira Campaña Antártica do Exército de Terra van iniciar a súa preparación en San Vicente do Mar, no Grove. Os militares seleccionados prepararanse para apoiar o labor investigador que desenvolven científicos de todos os países que o Exército ten na Antártida.
O exército ten como misión principal manter a presenza de España no territorio antártico, proporcionando apoio loxístico á investigación científica e realizando proxectos de interese, principalmente nas áreas de transmisións, medio ambiente, sanidade, bromatología ou vestiario e material de campamento.
O perfil dos militares que se están preparando no Grove, despois de pasar por unha selección entre 200 voluntarios, é dunha media de 43 anos de idade e 24 de experiencia militar en, polo menos, cinco destinos diferentes e unha media de tres misións internacionais ás costas, ademais dun bo nivel de inglés. A maior parte están casados e teñen unha media de dous fillos.
O seu destino será a Base Antártica Española "Gabriel de Castela", situada na illa Decepción, no arquipélago das illas Shetland do Sur. Na Antártida terán que facer fronte a sensacións térmicas de ata 25 graos baixo cero, ventos que poden alcanzar os 120 quilómetros por hora e o risco de convivir xunto a un volcán activo.
No Grove adéstranse no manexo de embarcacións pneumáticas do mesmo estilo das que terán que utilizar nas frías augas polares. A súa formación é esencial para garantir a seguridade dos científicos que estudan a flora e fauna deste descoñecido territorio.
Recibirán formación sobre navegación e movemento, normas de seguridade e regulamentos de marcas e sinais. Realizarán prácticas de montaxe e desmontaxe de embarcacións a motor, manexo das mesmas entradas e saídas de praia, navegación, emprego de GPS, saltos a auga, natación e emprego de traxes de supervivencia.