A través dunha acción artística protagonizada pola artista Carmen Hermo, os socialistas de Pontevedra difundiron este xoves as principais propostas que o seu partido presenta nestas eleccións galegas no eido da cultura e da lingua galega.
Foi cun "lenzo en branco", como símbolo da herdanza da "nociva xestión cultural" do PP e que os membros do PSdeG-PSOE encheron de "visión progresista e amor pola cultura e a lingua".
A candidata Paloma Castro avanzou que os socialistas impulsarán un plan de apoio ás industrias culturais, a potenciación dos sectores culturais e creativos, a industria audiovisual e o patrimonio ou a elaboración dun catálogo de servizos para garantir o acceso de todos á cultura.
Salientou a importancia dun goberno "que se implique na posta en valor do patrimonio cultural galego, que forma parte da nosa identidade como pobo e que conforma un sentido individual e colectivo de pertenza a unha comunidade, que axuda a manter a cohesión social e territorial".
"A Xunta tende a ignorar á xente da cultura. Ten unha relación ausente que denota unha falta de interese absoluta", subliñou Castro que, xunto con Carmen Hermo, explicou tamén algúns dos proxectos concretos que os socialistas queren activar en Pontevedra.
Entre eles, citaron a transformación da praza de touros nun espazo polivalente para grandes eventos musicais, culturais ou deportivos, a creación dun centro de interpretación do Camiño Portugués, a posta en valor do conxunto artístico da Illa das Esculturas, o impulso da Bienal de Arte ou a celebración dunha Bienal de Xardinería en Santa Clara.
Paloma Castro defendeu a necesidade de desenvolver políticas fundamentadas en fomentar a creatividade como motor económico, facilitar o acceso universal á cultura, apostar por unha produción cultural e artística profesionalizada ou promover a educación creativa.
Ademais, reivindicou converter o turismo cultural nunha prioridade estratéxica ou avogar por unha sociedade plurilingüe, impulsando un clima de coexistencia das linguas, evitando a discriminación dos falantes e fomentando a presenza do galego en todas as esferas da vida.