A emoción dos campionatos do mundo Multisport de tríatlon tiveron continuidade este xoves en Pontevedra coa disputa do Mundial de acuatlón, que encheu de actividade e cor a contorna do río Lérez.
Foi unha gran xornada para o deporte galego, que sumou varias medallas nas probas principais.
Na carreira que inauguraba o día (categorías elite, sub-23 e júnior), con saída ás 15:00 horas, a afección local gozou do bo papel dos deportistas españois e galegos. Así, o lugués Esteban Basanta proclamouse campión do Mundo na categoría júnior (16º na xeral) ao completar os 1.000 metros de natación e os 10 quilómetros de carreira a pé do acuatlón en 30 minutos e 10 segundos. Por detrás del chegaría o ribeirense Jorge González para levar a medalla de prata, completando o podio o ucraíno Vitalii Vorontsov.
Tamén en idade sub-23 tocou metal a representación galega grazas ao compostelán Andrés Cendán, que foi bronce (29:48) nunha categoría na que venceu o navarro Ander Noain (29:39).
En canto á categoría elite, non lle foi mal ao equipo español, que conseguiu unha nova medalla de prata da man Kevin Tarek Viñuela. O leonés foi o primeiro en saír da auga e iniciar a carreira a pé, pero non contaba coa espléndida remontada do acerbaixano Rostislav Pevtsov, que lle recortou 47 segundos para cazarlle no tramo final e marchar cara ao triunfo final (28:52). Viñuela foi finalmente segundo (29:15) superando a un dos grandes nomes do tríatlon internacional nos últimos anos, o ruso Dmitry Polyanskiy (29:22), que foi bronce repetindo o resultado que logrou na Boa Vila no ano 2011 no Campionato de Europa Absoluto na modalidade olímpica, cando era un dos rivais asiduos de Javier Gómez Noya.
Menor fortuna correu a delegación nacional nas carreiras femininas, onde non chegou ningunha medalla española pero si houbo moita emoción. Tanto é así que a proba elite decidiuse nun bonito sprint final en favor da polaca Alicja Ulatowska (33:10), aínda deportistas en idade sub-23 e que celebrou cun berro de rabia o título superando á húngara Bragmayer Zsanett (33:15) e á mexicana Itzel Arroyo (33:28).
A naronesa Sara Guerrero conseguiu o mellor posto nacional no acuatlón feminino ao ser cuarta en idade sub-23 (12ª na xeral) xusto por diante da tomiñesa Iria Rodríguez.
Completou o palmarés da xornada a italiana Bianca Seregni ao proclamarse campioa do mundo júnior de acuatlón cunha gran cuarta praza na clasificación xeral elite. Sexta nesta categoría foi a española Clara Aulinas.