O idilio de Pontevedra cos eventos deportivos de nivel internacional prolongouse durante o ano 2024 con grandes competicións e tamén cunha designación.
De feito a maior noticia respecto diso é esa, a elección da Boa Vila como sede por segunda vez da Gran Final das Series Mundiais, o gran evento do tríatlon mundial.
Será en 2026, e antes Pontevedra aínda acollerá en 2025 os Mundiais Multideporte, pero o excelente recordo do sucedido no ano 2023 resultou decisivo. Os plans eran optar á edición de 2027, pero a Federación Internacional suxeriu adiantar un ano esa candidatura e o resultado foi unha elección por unanimidade impñéndose a Budapest, Sardeña ou México.
"Tenía que ser Pontevedra por la impronta que dejó el año pasado en cuanto a pasión de los aficionados, afluencia de público y, en definitiva, una ciudad volcada que se merecía la concesión de otra final", recoñeceu tras a designación o presidente da Federación Española de Tríatlon, José Hidalgo.
O alcalde, Miguel Anxo Fernández Lores, afirmaba pola súa banda que a elección da cidade era "unha mostra de que facemos as cousas ben".
En todo caso despois da Gran Final de 2023 e cos Campionatos do Mundo Multideporte no horizonte, o ano 2024 podía parecer de transición, pero non o foi grancias a outras modalidades deportivas que deixaron pegada con grandes competicións.
No mes de setembro o Pavillón Municipal dos Deportes foi escenario do Campionato do Mundo U20 de Loitas Olímpicas, unha cita que contou con ao redor de 700 deportistas de até 85 países diferentes e no que a loita española fixo historia, ao lograr a súa primeira medalla de prata nun Mundial, independentemente da categoría. Conseguiuno a balear Carla Jaume.
Apenas un mes despois o protagonismo recaeu no ciclocrós, cun espectacular Campionato de Europa disputado nun circuíto habilitado para a ocasión na Illa das Esculturas.
Supuxo un éxito tanto de asistencia (acudiron máis de 9.000 espectadores) como de participación, coroándose como campións continentais da máxima categoría o belga Thibaut Nys e a holandesa Fem Van Empel, pero co alacantino Felipe Orts derrubando muros para o ciclismo nacionsl asinando unha medalla de prata para o recordo.
REAPERTURA DE RÍAS DO SUR
Dentro dos plans para seguir acollendo na cidade competicoines deportivas de nivel nacional e internacional, este ano deuse un paso importante logrando a reactivación dunha instalación considerada "estratéxica", como é o Complexo Deportivo Rías do Sur e a súa piscina olímpica.
De feito, tras retomar a actividade no mes de febreiro, desde un dos clubs que usan habitualmente as instalacións como o Club Natación Galaico afirmaban que a súa intención era converter Ponte Muíños nunha sede nacional.
De momento eses plans xa se traduciron na designación de Pontevedra como organizadora de dous campionatos de España para o próximo ano, co Nacional Alevín-Infantil de Inverno de Natación Artística e o Campionato de España Infantil de Inverno de Natación.