O Partido Popular puxo o broche este venres á campaña electoral cun acto que tivo lugar na Praza da Ferrería. As chuvias que caeron esta tarde sobre Pontevedra a punto estiveron de estragar a velada. "Se chove que choia. Se aguantamos ao BNG todo este tempo como non imos aguantar un pouco de choiva", ironizaron os populares.
Acompañado da secretaria local da formación, Pepa Pardo, e a vicepresidenta segunda do Congreso, Ana Pastor, o candidato do PP á alcaldía, Rafa Domínguez, apostou por ser a partir do 28 de maio o "alcalde do diálogo".
Domínguez comprometeuse a traballar "incansablemente para lograr consensos e atopar solucións aos desafíos que enfronta a cidade".
"Non nos vale cun sobresaliente. Imos a por a matrícula, a por a maioría absoluta, e témola aí", defendeu o candidato popular confiando "no respaldo dos pontevedreses para liderar este proceso de cambio e transformación".
Porque ao seu xuízo o 28 de maio "os cidadáns teñen a oportunidade de elixir entre o continuísmo de quen pretende manter pechada a cidade, ou o cambio real que propón o noso equipo, baseado no diálogo, a escoita activa e o compromiso co futuro de Pontevedra".
Durante a súa intervención Rafa Domínguez destacou varios dos puntos clave da súa campaña, como a proposta de abrir Pontevedra á ría, a aposta por un rural vivo e sostible, a xeración de emprego, acrecar a universidade ao centro da cidade cunha sede no Hospital Provincial, a mellora dos barrios, a creación de novos aparcamentos disuasorios e por suposto a apertura ao tráfico da rúa Raíña Vitoria.
PASEO CON ALFONSO RUEDA
Horas antes do acto de peche de campaña, o candidato local do PP contou unha vez máis co apoio do presidente do Partido Popular de Galicia, Alfonso Rueda, nun paseo polas rúas da cidade.
"Os políticos do século XX non poden pretender seguir propoñendo cousas cando xa non teñen ideas para unha cidade", sinalou Roda referíndose ao nacionalista Miguel Anxo Fernández Lores.
O líder do PP galego chamou ademais a unir o voto ao redor de Rafa Domínguez para "ter unha maioría que lle permita gobernar con forza e darlle a esta cidade o empuxe que necesita".