"Por moito que se empeñen os sectores máis reaccionarios e intolerantes, non se lles poden poñer freos á igualdade e á xustiza social. A primavera socialista é imparable na nosa cidade". Con esta sentida mensaxe a prol "dunha Pontevedra para todas e todos, diversa, plural e libre de descursos de odio", presentou este domingo en Pontevedra o cabeza de lista da agrupación municipal do PSOE, Tino Fernández, a candidatura coa que os socialistas concurrirán ás vindeiras eleccións municipais.
Segundo subliñou, trátase dunha candidatura "progresista, moi xoven, feminista, paritaria e absolutamente comprometida coa loita pola igualdade e os dereitos sociais", da que forman parte, en postos destacados, "varias mulleres adicadas a loitar diariamente contra a violencia de xénero" e activistas en colectivos de carácter social.
Para Fernández, co PSOE no Goberno central, o equipo que lidera "é de lonxe a mellor opción que poden escoller os pontevedreses para defender os intereses da nosa cidade".
"O presidente Sánchez xa deixou ben claro que vai escoitar tódalas reivindicacións e demandas que dende aquí lle fagamos os socialistas de Pontevedra. Moitos dos problemas e as demandas históricas da nosa cidade pódense resolver co PSOE no goberno municipal", apuntou.
O candidato á Alcaldía asegurou que "o conxunto da sociedade é moi consciente da importancia dun partido capaz de defender os dereitos fundamentais das persoas por riba de todo e que conserva no seu ADN algo que as outras formacións olvidaron hai tempo: empatía e diálogo".
"As tres ultradereitas tiveron ultimamente tantos cambios de identidade que non sei se os seus votantes terán moi claro que están a votar exactamente. Os posicionamentos intransixentes non arranxan nada e ata algúns grupos empresariais déronse conta de que, se queren solucións, precisan dun partido co que poidan dialogar", afirmou.
Tino Fernández destacou ao equipo de 24 persoas que o acompañará ás eleccións do 26 de maio como "a única lista que realmente representa a diversidade, a heteroxeneidade e o sentimento plural dunha sociedade que pide cambios e que non quere ser silenciada nunca máis". Así, contará coa primeira muller trans en presentarse a unhas eleccións en Galicia, a activista LGTBI e avogada especializada en violencia de xénero Ada Otero (6).
En postos de cabeza da candidatura irán outras dúas mulleres avogadas, tamén con moita experiencia en casos de violencia de xénero e implicadas de xeito moi activo na loita do colectivo feminista pontevedrés: a actual responsable de Comunicación e Redes Sociais do partido, Gloria Blanco (número 2 da lista) e a secretaria de Igualdade da Agrupación Socialista, Paloma Castro (4). Iván Puentes, ex alcalde de Fene e concelleiro durante o pasado mandato, irá como número 3, mentres que o presidente dos comuneiros e da comunidade veciñal de Verducido, Marcos Rey, e o vicesecretario xeral do PSOE municipal, "Yeyo" Pérez Agulla, ocupan o 5 e o 7 respectivamente.
O histórico dirixente veciñal Ángel Mario Lago, outra das principais "fichaxes" da candidatura, concurre como número 9; a tamén voceira veciñal Arancha Fernández ocupa o 8, e a responsable de Movementos Sociais da Executiva Local, Eugenia Jorge Marinero, faino de 10. O responsable da área de Educación da Executiva Local, Rafael Cotelo (representante de Persoal Non Docente na Uned) vai de 11; a dirixente veciñal Carmen Alfonso de 12; o funcionario Héctor Santaló, xefe do Servizo de Inspección Tributaria do Concello de 13; a avogada Marica Adrio de 14, e Jesús Cancela de 15.
Teresa González, responsable de Política Social, é a número 16 da lista, e o enxeñeiro químico Roberto Taboada, o 17, mentres que o novo secretario xeral das Xuventudes Socialistas de Pontevedra, Santiago Abal, concurre de 21. Completan a lista Rocío Carrera, veciña de Eduardo Pondal (18); a docente Pilar García Pinal (20); a procuradora Cristina del Río (22); Christian Fernández (23), veciño de Lourizán, e Jesús Fernández (19), veciño de Monte Porreiro e membro da executiva local.
Pechan a candidatura a veterana militante Maruja Serafín (24), veciña de Fontesanta, e o presidente da Agrupación Municipal do PSOE en Pontevedra, Xosé Benito Gama (25).