Cada vez que hai unha cita coas urnas sempre xorde a mesma incógnita: a quen van votar os novos votantes. Este 28 de maio moitos pontevedreses e pontevedresas menores de 22 anos participarán por primeira vez nas eleccións municipais dunha cidade, Pontevedra, na que non coñeceron a outro alcalde que non sexa Miguel Anxo Fernández Lores.
Con todo, o grao de coñecemento dos candidatos á alcaldía entre os universitarios lerezanos é escaso. Salvo a Lores, apenas coñecen ao resto de alcaldables nin as súas propostas. Un feito que non implica que non estean preocupados polo futuro da súa cidade, da que encomian o modelo urbano pero non dubidan en alertar dalgunhas carencias importantes.
"En Pontevedra nunca vimos outra cousa que non sexa o Bloque e tampouco sabemos que poden ofrecer outros partidos porque non temos referentes. As propostas doutros, son propostas que poden cumprir ou non. A miña intención é votar, pero terei que informarme antes das eleccións por que non sei a que partido vou votar", recoñece Andrea Hermida, estudante de enfermería de 21 anos.
"Non coñezo a ningún, de política a tema de alcaldía, cero", confesa *Álex Calvo, universitario de vinte anos que xa exerceu o seu dereito ao voto por correo. Máis indecisa móstrase Lucía Franco, que aínda está a pensar que papeleta introducir na urna. "Aínda non o sei, ata que teña tempo de mirar os candidatos e informarme ben, non decidirei", sostén á vez que asegura que "non síntome representada por ningún político".
"Dos nove candidatos coñezo a varios, pero non me representa ningún. É difícil elixir a alguén, estes días estiven vendo que presentan e quen eran, vou votar pero non sei aínda a quen", explica Violeta Ramos, estudante de Educación Infantil. "Coñezo a BNG, PP, VOX, Podemos, Cidadáns e Pacma. Non me sinto representada polos políticos, pero votarei ao BNG", asegura Carmen Pazos.
Recoñecen que vivir alleos á política municipal é algo moi común entre os da súa xeración. "É algo que nos pasa a toda a xente da nosa idade. De normal interesámonos pouco pola política, decatámonos un pouco a nivel nacional, pero a nivel local, non tanto", sinala Hermida unha mostra do pouco que visitan os aspirantes á alcaldía o campus de Pontevedra, aínda que tamén é certo que unha parte dos potenciais votantes estudan en facultades doutras cidades.
Aínda así, o feito de descoñecer o nome dos candidatos a alcalde non implica que non estean preocupados polo futuro da súa cidade. "Pontevedra está cada vez peor, pechan tendas e a cousa non mellora. O mellor é a paz que se respira, pero fai falta unha boa xestión da cidade, que axude aos pequenos empresarios e promova o crecemento", defende un crítico Calvo.
Para Pazos, o peor da súa cidade é Ence. "Esta fábrica contamina e ameaza seriamente a biodiversidade, xa que é unha das principais fontes que contribúen á plantación de eucaliptos en Galicia", subliña a universitaria, moi crítica tamén coa presenza de lombos, a falta de aparcamentos, o mantemento das estradas no rural e a falta de prazas en residencias de anciáns.
Moita xente nova síntense desubicados na súa propia cidade. "Pontevedra non é unha cidade na que me gustaría pasar a miña mocidade, está máis enfocada para estabilizarte na vida e formar unha familia. Moitas veces pregúntome que fago aquí, se xa o fixen todo", sostén Violeta con preocupación porque "é unha cidade marabillosa".
Pero non todo é negativo. "Pontevedra é unha cidade moi cómoda no sentido da accesibilidade a lugares, porque ao ser unha cidade pequena e por como esta construída chegas moi rápido a todas as partes céntricas", recoñece Lucía.
Neste sentido, engade Ramos que moitos dos eventos que se organizan na cidade non teñen a visibilidade que deberían. "Cantas persoas de Pontevedra visitaron os museos? A maioría seguro que non foi nunca", lamenta ao mesmo tempo que pon en valor programas como Noites Abertas ou o Salón do Libro, así como a recuperción para o patrimonio público do convento de Santa Clara.
"As aforas están un pouco incomunicadas e eu creo que non viría mal retocar os horarios dos autobuses que van ás zonas de Lérez, Monteporreiro, Poio etcétera. Porque os buses a metade de veces non aparecen e se aparecen fano cada 4 horas", lamenta. "Que sexa peonil está moi ben porque se reducen emisións, pero tamén é un coñazo circular e aparcar o coche, que tamén é algo que se necesita", comparte Hermida.
É no plano cultural no que máis carencias observan os novos votantes. "Hai moi poucas opcións para propostas artísticas. O teatro e a danza están moito menos promocionados que outros sectores", reclama Franco. "Hai moito evento, sobre todo deportivo, que está xenial porque trae a moita xente. Pero nas festas, como a Peregrina ou Nadal, son un pouco cutres. Non fai falta chegar ao extremo de Vigo, pero poñendo unhas boas luces e máis actividades de Nadal quedaría máis bonita e atraería a máis xente a pasar un día", critica Andrea, a quen tampouco lle convence as propostas musicais do verán.
"Os concertos están enfocados ao de sempre, a xente maior, en lugar de traer artistas máis coñecidos. Faltan eventos enfocados na mocidade, non se nos ten en conta", quéixase.
A rama do emprego é algo que tamén preocupa a esta nova xeración de adultos pontevedreses. "Non se dá case ningunha axuda á xente nova a introducirse no mundo laboral de forma que se poida compaxinar con outros aspectos diarios", expón Lucía.
Con todo isto, o sentir xeral dos que este ano se incorporan ao electorado pontevedrés é que "a Pontevedra non se lle saca o partido que se lle podería sacar, está estancada, podíase renovar un pouco", conclúe esta futura enfermeira.