Aos seus 36 anos, Carlos Fontán é o máis novo de todos os candidatos a alcalde. Por iso é polo que non dubide en sinalar que o partido que el lidera, Pontevedra Alternativa, quere "ser a voz dos mozos", un colectivo desconectado da política "porque non se senten representados".
Á fronte dun equipo "que somos os únicos que non pisamos alfombra", aposta por solucionar os "fallos estruturais" que aprecia en Pontevedra, unha cidade da que encomia o seu modelo urbano e que el e os seus comprométense "a manter e a non esnaquizalo".
Por que decidiches presentarte para ser alcalde?
Foi na pandemia. Deime conta de que socialmente nos desconectamos. Eu estaba na asociación de hostaleiros e a xente estaba moi encabuxada. Empecei a pensar niso na casa. Ao final, desde a política é cando se pode empezar a facer algo para cambiar as cousas.
E cando xorde a idea de recuperar Pontevedra Alternativa?
Un día tomando unha caña no local de Petete díxome que tiña un partido e que o rexistro caducaba nun mes. E engadiu, medio de broma, que por que non collía ese proxecto. Pedinlle que me pasase a documentación, contratamos un avogado e decidimos presentarnos.
Co partido xa nas vosas mans, como trazastes o voso proxecto político?
Empezamos expóndonos que queriamos para Pontevedra, que cidade queriamos ser e que é o que iamos facer. Ao final está moi ben capitalizar á hostalería, pero había que dar máis porque esta cidade ten grandes fallos estruturais. E aí naceu todo este proxecto.
Que crees que achegades á escena política local?
Savia nova. Ideas novas. Non podes ser o PP, falar de cambio e levar a mesma lista electoral que a outra vez. Somos os únicos que non pisamos alfombra. Somos un equipo de traballo que non temos nada que ver coa política. O resto si, todos.
Consideras entón que esa falta de experiencia política é un valor?
Para min si. Ninguén nace político. Pero eu estou a pé de rúa e escoitando todo o día á xente. Empápaste do descontento que hai. Sobre todo na xente nova. Somos a xeración que nos imos a Madrid e non volvemos. Está a irse moito talento. A miña cidade está a morrer.
Crees que os mozos non están a ser escoitados?
Eu creo que non. É certo que os mozos están desconectados da política local. Non lles interesa, cren que non lles afecta. Pero é porque non se ven reflectidos en ninguén. Non hai referentes por debaixo dos 40 anos. Nós somos como eles, falamos a súa linguaxe. Temos que empezar a facer política para eles. Son os que temos que reter aquí.
Contigo, como número 2, vai Ana Cedeira. Unha muller vinculada co ambiente sindical, presidenta do comité das oficinas de Ence. Que viches nela?
"Somos os únicos que non pisamos alfombra. Somos un equipo de traballo que non temos nada que ver coa política"
Ana é unha loitadora. Eu non a coñecía persoalmente. Quedei con ela e díxenlle que estaba a buscar xente nova para traballar por Pontevedra. Ela achega moita experiencia e ten unha gran rede de contactos no mundo sindical e laboral. É unha muller con moito peso.
E Ence que papel xoga en toda esta estratexia?
Foi o noso primeiro dilema. O noso posicionamento neste tema. Sabemos que a localización é unha cagada, pero entendemos que o emprego é importante. Hai poucas empresas que sexan un tractor económico como o é Ence. Loxicamente, tes que defendela.
Entre as vosas propostas, de feito, figura con nomes e apelidos...
Nós queremos que Pontevedra sexa capital industrial do sector forestal. Temos a facultade, temos centros de investigación e temos unha fábrica que xera enerxía e pasta de papel. Non é traer só unha feira, senón máis empresas e pechar o círculo. Todo iso, pasa por Ence.
Consideras que Pontevedra agora mesmo non é capaz de atraer emprego?
Non. E eu creo que é deixamento de todos. O cabreo constante entre o Concello e a Xunta non permite que a cidade se desenvolva. Ten Ponte Caldelas un polígono industrial case máis grande que o noso. Fáltanos unha formulación industrial. Nós si que a temos.
Como definirías á Pontevedra actual?
Comparto este modelo amable co peón. Pero non podemos só peonalizar e facer que a cidade estea bonita. Hai que ir moito máis alá. Fixéronse cousas moi boas, pero o goberno municipal desconectouse da cidadanía.
En que sentido?
Hai que recuperar a vida de barrio. Deberían falar máis coas parroquias e os barrios. Non só coas asociacións que teñen compradas. Refírome a falar verdade coa xente. Ir aos sitios e darse un paseo. Que a xente che faga ver os fallos que hai.
O alcalde sostén que a única garantía para manter o actual modelo urbano é o BNG. Compartes esa apreciación?
Lores é un tipo ao que admiro e aprecio. Foi alcalde 24 anos. Transformou Pontevedra. Adiantouse vinte anos a un modelo de cidade que logo copiou todo o mundo. Iso agora hai que conservalo e mantelo. Non hai que esnaquizalo para nada.
Pero cambiariades algo?
Pontevedra ten fallos estruturais. Está moi ben este modelo, pero hai cousas que mellorar. Creo que faltan catro pinceladas, que marcarían a diferenza. Pero eles non as ven. Están endiosados, como un paso por encima dos demais. Non podemos trasladar a Feira Franca á política local. Quedarnos no castelo e amurallar a cidade.
Vedes a Pontevedra como unha cidade pechada?
A zona peonil dinamiza moito o comercio, pero a circulación de vehículos tamén. Estás a atraer xente. Non podes provocar que a xente do rural non veña a Pontevedra porque non haxa transporte público ou onde aparcar. E faltan hoteis. Non temos a suficiente capacidade.
"O primeiro que faría é poñer unha rúa a Lores ou un monumento. É unha persoa que transformou Pontevedra e meréceo"
Que crees que é máis urxente cambiar?
Hai problemas de circulación. A xestión dos residuos ou o mantemento dos xardíns tampouco se está facendo ben. Non podes ter aos teus funcionarios encabuxados. Hai que axilizar as licenzas. A política ten que ir encamiñada a volver conectar co cidadán.
E Raíña Vitoria? Sodes partidarios de reabrila?
Si, pero ten que conlevar un plan de tráfico. Non é abrila sen máis. Cremos que os coches teñen que moverse ao redor da cidade, non meterse nela, Pero para iso tes que duplicar os aparcamentos ou poñer lanzadeiras. Agora mesmo, a xente ve en Pontevedra unha muralla.
E como encaixa iso na aposta por unha cidade máis verde?
Nós apostamos por crear cinco grandes parques na Parda, Mollavao, A Seca e en Beiramar. Forman parte da planificación que deseñamos para a cidade. Agora non temos cara a onde crecer porque non temos un PXOM, que é a base de todo isto. Avanzamos en base a improvisacións que me dan bastante medo.
Con que expectativas afrontades estas eleccións?
Eu o que busco é ser chave de goberno. Ou para uns ou para outros. Oxalá entrásemos todos os que nos presentamos. Sería a mellor maneira de facer política de verdade. Que teñamos que chegar a acordos e ceder uns e outros. Pero se teño que elixir, que entremos nós.
Se tras o 28M foses o alcalde de Pontevedra, cal sería a túa primeira medida?
Poñer unha rúa a Lores ou un monumento. É unha persoa que transformou Pontevedra e meréceo. E logo, sacar adiante o noso programa. Son once plans moi realistas.