Aos poucos vanse coñecendo máis detalles da próxima edición da Vuelta a España. En PontevedraViva xa vos contamos que Vilanova de Arousa acollerá o día 24 de agosto a saída da 68ª edición da proba ciclista por excelencia no noso país. Ou que Pontevedra será o punto de inicio da terceira etapa. Pero a estas dúas localidades, uniuse unha terceira, Vilagarcía de Arousa. A capital arousana tamén será protagonista na Vuelta.
En concreto, Vilagarcía de Arousa será a meta da segunda etapa da proba. Será o domingo 25 de agosto. Aínda que non se coñecen moitos detalles da etapa, si transcendeu que atravesará a cidade de Pontevedra camiño de Vilagarcía e que o punto de saída será nalgunha localidade do sur da provincia de Pontevedra.
Será polo tanto unha edición na que as Rías Baixas terán moito que dicir. A primeira etapa, unha contrarreloxo por equipos de entre 20 e 30 quilómetros, sairá desde unha plataforma marítima do porto de Vilanova de Arousa e finalizará nunha localidade de O Salnés aínda por determinar. Sanxenxo e O Grove son as grandes favoritas para acoller a meta da etapa inaugural.
A terceira etapa, o luns 26 de agosto, sairá de Pontevedra. Mediante unha saída neutralizada, fará un percorrido dun máximo de oito quilómetros polo centro da cidade. Aínda que o percorrido aínda está por pecharse, será unha etapa que segundo adiantou o alcalde, Miguel Fernández Lores, irá cara ao sur da provincia e probablemente se meta en Portugal. Segundo fontes da organización, barállase Baiona como final desta etapa.
E para rematar, a cuarta etapa, a última que atravesará as estradas da provincia de Pontevedra será o martes 27 de agosto. Terá a súa saída nalgún punto da xeografía pontevedresa aínda por determinar e finalizará, se se cumpren os plans da organización da Vuelta, en Fisterra, previo paso por un dos grandes atractivos da pasada edición, o Mirador de ÿzaro, situado no concello coruñés de Dumbría.