Disparado vai esta tempada o Tenis de Mesa Monte Porreiro na Superdivisión Masculina.
Salvo o empate na terceira xornada fronte ao Alzira nun duelo marcado polos imprevistos no equipo pontevedrés, os pupilos de Nando Álvarez sumaron todos os seus compromisos por vitoria.
O último foi este mércores 6 de novembro co encontro que pechaba a quinta xornada de liga, visitando o Universidad de Burgos.
O Visit Pontevedra presentou a súa aliñación titular, e dominou en todo momento aínda que nun enfrontamento tremendamente disputado.
Así se demostrou nos dous choques de André Silva, superados ambos os dous en cinco mangas fronte aos locais Daniel Berzosa e Simon Belik.
Miguel Ángel Vílchez gañou pola súa banda ao propio Belik e a David McBeth para certificar o triunfo do Monte Porreiro cun resultado final de 2-4 xa que Martín Betancor cedeu nesta ocasión nos seus dous partidos.
O triunfo impulsa o equipo pontevedrés, que se coloca segundo na clasificación con 9 puntos e empatado co líder, o Priego TM.
Sen apenas tempo para o descanso o Visit Pontevedra frontará unha nova xornada de liga este domingo 10 de novembro, esta vez na casa recibindo no pavillón de Príncipe Felipe ao Irún Leka Enea, actual cuarto clasificado.