Repartición de puntos no derbi entre a Sociedade Deportiva Teucro e o Bueu Atlético co que deron comezo ao ano 2025 (32-32).
O equipo lerezano foi de menos a máis e mesmo puido facerse co triunfo, pero no tramo final complicouse de mala maneira e terminou cedendo un empate.
De feito é que foron os de Luís Montes os que saíron máis enchufados á cancha, conectando un parcial de 5-1 tras aproveitar a exclusión de Sergio Wagner que os deixaba en superioridade numérica.
Foi entón cando Irene Vilaboa decidiu deter o cronómetro para deter a seca anotadora dos seus, que por fin reaccionaron para recortar distancias en dúas tantos.
Con todo, unha nova exclusión, esta vez de Rhuan, permitiu ao Bueu volver estirar a diferenza e pór contra as cordas aos visitantes, incapaces de frear a un rival que impuña o seu xogo e pechaba o primeiro tempo nun resultado de 18-15.
Tras o intermedio a historia repetiuse. Os locais mantivéronse por diante, aínda que en distancias curtas (máximo de tres goles), ata que os acertos de Ricardo González, Gonçalo Areias e Caue Herrera cambiaron o rumbo, permitindo ao Teucro encarar os últimos 15 minutos coa máxima igualdade.
A partir de aí, calquera erro resultaría clave. Adri Suárez foise dous minutos ao banco e entre Gonçalo e Brais Cerviño encargáronse de voltear o resultado e pór ao Teucro en vantaxe por primeira vez (27-28).
Responderon os locais con outro 2-0 que volteaba o luminoso, pero os tantos de Brais Cerviño e Miguel Monteagudo valéronlle aos de Irene Vilaboa para recuperar o dominio. Roque Arias fallaba desde os sete metros, e Gonçalo puña o +2 nos instantes máis críticos (29-31).
Parecía que o conxunto teucrista xa tiña o partido onde quería, e puido mesmo incrementar a diferenza en dúas tantos, pero Dani Fernández, decisivo baixo paus, interveu para evitar o tanto visitante e así manter ao seu equipo con vida.
Andrés Bacelar reduciu diferenzas para o Bueu e Ricardo González fixo o propio para o Teucro, que se apagou na recta final e viuse superado por un rival que facía, por medio de José López, os dous tantos que selaban o empate a 32.
Consulta neste enlace as estatísticas