Perdeu o Numancia na casa do Marino de Luanco e o Pontevedra Club de Fútbol fixo os deberes en Pasarón, superando pola mínima o Guijuelo e, con iso, recuperando o liderado de Segunda Federación.
Non foi tarefa sinxela, e é que os salmantinos, cunha boa defensa, concederon o mínimo aos granates, que ademais perdoaron en exceso. Só Charly, cun gol á media hora de xogo, foi capaz de bater a portaría rival para deixar os tan importantes tres puntos na Boa Vila.
Da mesma maneira que ocorrera no partido fronte ao Escobedo, ao Pontevedra tocoulle atacar na primeira metade cara a Fondo Norte, algo pouco habitual nos enfrontamentos na casa. Aínda así, os granates non renunciaron ao seu estilo de xogo, aínda que con certos cambios na aliñación.
Garay e Igor saíron ao campo como parella de centrais, con Álex e Javi Fontán nos laterais. Samu e Yelko compartiron medular, con Brais Abelenda de media punta, Miguel Cuesta na banda dereita, Chiqui na esquerda e Charly de dianteiro.
En portaría, Edu Sousa asistiu ao partido como mero espectador, polo menos durante os primeiros 20 minutos, controlando o que pasaba no campo dun Guijuelo que permaneceu replegado atrás cos seus once homes á espera de atopar a súa oportunidade á contra.
Pero o Pontevedra, a pesar de vivir en campo rival, era incapaz de xerar ocasións de perigo e buscaba facer dano con disparos afastados que, ou daban na defensa, ou os paraba Guzmán.
A máis clara, con todo, foi para os visitantes no minuto 19 nun contragolpe. Panaaproveitou un erro garrafal de Igor para plantarse ante Edu, abriu á esquerda, pero para fortuna dos granates, Javi Fontán chegou a tempo para pechar. Na seguinte xogada, un córner a favor do Guijuelo, Javi Lache cabeceou entre os tres paus pero Edu, cunha boa estirada, desviou a saque de esquina.
Alcanzouse a media hora de xogo e foi entón cando o Pontevedra conseguiu abrir a lata. Yelko centrou desde a esquerda a Charly, que apareceu dentro da área e, cun disparo cruzado coa esquerda, logrou bater a Guzmán. Cinco minutos despois, o dianteiro tivo que ser substituído por Rufo ao sentir molestias nunha perna.
Entrou a primeira parte na recta final e os locais continuaron tendo presenza en campo rival, aínda que en menor medida. Yelko tivo unha dobre ocasión con senllos disparos desde o bordo da área e, xa no desconto, Miguel Cuesta plantouse ante o gardameta visitante tras un gran pase en longo de Brais, pero fíxoselle de noite e Guzmán atrapou.
Despois do paso polos vestiarios, o Pontevedra saíu disposto a marcar o segundo gol cunha alta presión á saída de balón do Guijuelo e buscando profundidade pola banda esquerda con Chiqui e Álex. Foi de feito este último o que tivo nas súas botas o 2-0cun disparo desde a esquerda, pero marchou desviado por moi pouco.
Pasada a hora de xogo, Yago Iglesias moveu ficha e deu entrada a Xabi e Iago Novo en lugar de Miguel Cuesta e Brais para xerar maior perigo en portaría rival e sentenciar o duelo, pero aos granates custáballes un mundo atravesar a zaga visitante e, cando o tiñan todo para marcar, aparecía un defensor para evitar o gol.
Iago Novo deulla a Rufo ao punto de penalti, o porteiro estaba vencido, pero Javi Hernández apareceu para despexar baixo paus. Despois foi o 8 o que puido facer o 2-0, pero esta vez foi Expo o que se encargou de evitar o tanto local.
Entrou o partido nos últimos dez minutos, pero o Pontevedra non lograba matar o partido. No seu lugar, o Guijuelo meteu o medo no corpo aos de Lérez cun centro raso de Pana que Yelko despexou.
Non lle saían as cousas aos xogadores locais por máis que tentaban bater a Guzmán. Ou se precipitaban á hora de xutar, ou tardaban demasiado e un defensor aparecía para pechar calquera opción. A pesar diso, o Pontevedra soubo xogar os minutos finais para facerse con tan importante triunfo que o aúpa, unha vez máis, á cima da clasificación.
PONTEVEDRA CF (1): Edu Sousa, Javi Fontán, Igor (Mario Gómez, min. 80), Álex González, Yelko, Chiqui (Héctor, min. 80), Samu Mayo, Miguel Cuesta (Xabi, min. 64), Brais Abelenda (Iago Novo, min. 64), Garay e Charly (Rufo, min. 37).
CD GUIJUELO (0): Guzmán, Montes (Yenerey, min. 74), Expo Jr, Mario Robles (Boigues, min. 25), Morais, Sillero (Kike López, min. 74), Pana, Cristóbal (Antón, min. 60), Javi, Fran López e Izan (Carmona, min. 60).
Goles: 1-0, Charly, min. 30.
Árbitro: Sergio Álvarez Ordóñez (Asturias), asistido nas bandas por Javier Gurpegui Guevea e Iván Blanco Rodríguez. Amoestaron a Samu (43') no Pontevedra, e a Expo (22'), Carmona (76'), Boigues (83') e a Kike (92) no Guijuelo.
Incidencias: Partido da xornada 26 de liga na Segunda RFEF disputado no Estadio Municipal de Pasarón ante 2.266 persoas.