Co equipo líder e ofrecendo grandes sensacións tanto na liga como na Copa do Rei, o Pontevedra Club de Fútbol vive sen urxencias o período do Nadal e a inminente apertura do mercado invernal de fichaxes.
Faino con todo con deberes sobre a mesa, e é que cun plantel curto a lesión de longa duración de Jesús Cambil obriga a pensar na necesidade de reforzarse para non verse castigado por un novo contratempo no tramo decisivo da tempada.
A secretaría técnica granate apostou este curso por un plantel algo máis limitado do habitual, arrincando no verán con só 19 futbolistas con ficha do primeiro equipo.
A normativa permitía até 14 xogadores maiores de 23 anos, e o Pontevedra deixou sen ocupar unha desas fichas, así como varias destinadas para futbolistas sub-23 ocupando ese oco en adestramentos e algúns convocatoria homes do filial. Neste sentido David Marqués participou en tres encontros e Sergio Canosa foi citado nunha ocasión.
Con todo a lesión de Víctor Vázquez 'Churre' no mes de outubro obrigou a moverse rápido para reforzar a unha liña defensiva que quedaba coxa de efectivos. Chegou entón un Pelayo Suárez que caeu de pé en Pasarón, gañando cada vez maior protagonismo na zaga.
O que ninguén contaba era con outra lesión importante como a sufrida por Jesús Cambil a principios do mes de decembro, e que deixa a Samu Mayo como único teórico pivote defensivo do equipo.
Esta situación, de novo con só 19 xogadores 'sans' no plantel, coloca no arame o Pontevedra e faille mirar cara a un mercado invernal que abre oficialmente o día 2 de xaneiro e que permitirá a inscrición de futbolistas até o 3 de febreiro.
Un centrocampista que cubra a baixa de Cambil asoma como unha das prioridades da secretaría técnica, pero non é o único posto a reforzar si xorden opcións interesantes. Desde verán o posto de extremo destro aparecía como un dos poucos do equipo sen dobrar, e a cifra de goles achegados pola dupla atacante (3 tantos de Rufo e 1 de Charly na liga) tamén apuntan cara á posibilidade de mirar cara a un dianteiro, xa sexa para ocupar unha das licenzas sénior ou tirando das sub-23 libres.
Sexa como fose, polo menos a Copa do Rei serviu para todos e cada un dos integrantes do primeiro plantel estean a gozar de minutos de calidade e achegando na rotación para manter o Pontevedra como un dos equipos máis en forma do todo o fútbol nacional.