Finalmente foron máis de 700 os deportistas que, segundo o Concello de Caldas, participaron este domingo 16 de marzo na segunda edición do Trail Laxe dos Bolos.
Con só dous anos de vida a carreira de montaña consolidouse como un evento de referencia, afirmando desde o goberno local que "foi de novo un éxito rotundo".
"Melloramos cada ano e temos xa a vista posta no 2026", avanza o edil de Deportes e tenente de alcalde, Manuel Fariña, satisfeito co transcurso dun evento deportivo que encheu de actividade a vila termal.
Alexandre Otero Iglesias foi o gañador da proba longa, Campionato Xunta de Galicia e bautizada como 'Desafío Xiabre', na categoría masculina con 27,6 quilómetros de percorrido. A pouco máis de tres minutos chegaba a meta Marcos Naya Badallo, completando o podio Roberto García González a 3:37.
María Platero Prado foi pola súa banda a vencedora na proba feminina cun tempo de 3 horas, 12 minutos e 20 segundos, con pouco máis de medio minuto de marxe sobre María Martínez González. Terceira foi Rosa María Araújo Losada.
Na proba de distancia media do Trail Laxe dos Bolos, con 16,64 quilómetros, o podio masculino estivo composto por Damián González Castro, Manuel Piñeiro Fiel e Fernando Lorenzo Guimaráns, mentres que o feminino o ouparon por esta orde Nerea Castro Nogueira, María Elisa Costas Pazos e Julia Salvado Diéguez.
Por último na carreira curta de 8,3 quilómetros os tres primeiros en categoría masculina foron Diego Ferreira Vázquez, Álvaro Soto Des e Manuel Vieites Carballo; e na feminina Lucía Taboada Codesido, Alma Pereira Fernández e Ainoa Galán Amo.
A xornada completouse cunha andaina popular de 12 quilómetros que congregou preto dun cento de persoas.