Pouco fútbol e escasas ocasións. Sporting de Gijón B e Pontevedra ofreceron un partido aburrido, sen un dominador claro, que terminou cunha xusta repartición de puntos e unha xogada polémica aos 10 minutos, cun gol anulado aos galegos, conseguido por Verdú, por estimar o árbitro un fóra de xogo moi discutido polos visitantes.
O Pontevedra comezou ben, levando a iniciativa, presionando moi arriba sobre a saída de balón do cadro branquivermello e creando pronto perigo, pero sen acerto no remate.
A primeira ocasión chegaba aos cinco minutos nun remate de Jandrín que detivo o meta Dennis en dous tempos. Pouco despois viría a xogada clave, cando o árbitro invalidaba un remate de Verdú que terminou no fondo das mallas, apreciando un fóra de xogo que ninguén viu, entre as protestas visitantes.
O filial sportinguista apenas chegou na primeira metade e unicamente dispuxo dun disparo de Pablo Fernández, que saíu desviado á dereita da meta de Edu.
Pablo Carnero tivo nas súas botas a mellor ocasión, pasada a media hora, pero atopouse por dúas veces co meta local.
A segunda parte volveu comezar con dominio visitante e con Pablo Carnero como protagonista, cunha primeira oportunidade nada máis sacarse de centro, nun remate de cabeza a centro de Jandrín, que saíu desviado.
Preto da hora de xogo a situación comezou a cambiar. O Pontevedra perdía a Pablo por lesión e de novo Carnero tería a última acción de perigo, nun remate que detivo de novo en dous tempos Dennis.
A partir de aí os granates cederon e pasaron a verse dominados por un Sporting B máis ambicioso, pero ben atado pola segura zaga visitante, que non permitiu que Edu pasase apuros.
Luisito daría entrada a Pedro García para volver recuperar o dominio da zona central, pero non puido cambiar a dinámica dun partido, especialmente ao quedar mermado nos últimos minutos Kevin Presa, con molestias musculares.
Os galegos volverían queixarse da actuación do arbitro, ao estimar que perdoou en dúas ocasións moi claras a segunda amoestación ao xogador local Cyril, pero lograron un punto e quizais por xogo e dominio tiveron opcións de conseguir algo máis que o seu rival, que non chegou a disparar a porta entre os tres paus.
REAL SPORTING DE GIJÓN B (0): Dennis; Sergio Menéndez, Garrido, Víctor Ruiz, Ramón; Guille Donoso, Mario Arques; Cyril, Jaime Santos, Pedro Díaz (Álvaro Bustos, minuto 62); e Pablo Fernández (Mendi, minuto 55).
PONTEVEDRA CF (0): Edu, Adrián, Campillo, Pablo (Bruno, minuto 58), Verdú; Kevin Presa, Álex Fernández; Jandrín (Pedro García, minuto 77), Pablo Carnero (Anxo, minuto 65), Mouriño; e Borjas.
Árbitro: Ibai Rezola Etxeberría (Vasco), auxiliado nas bandas por Javier Merino Sánchez e Aitor Mosqueira Antón. Amoestou a Cyril e Garrido, polo Sporting B, e a Anxo, Kevin Presa e Campillo, polo Pontevedra.
Incidencias: Campo número 1 de Mareo-Pepe Ortiz (Xixón). Uns 400 espectadores, con presenza de medio centenar de afeccionados galegos.