Nin sorpresas, nin confianzas nin descoidos. O Pontevedra ten prohibido fallar no seu partido fronte ao Laracha, en Pasarón (domingo, 17:00 horas), máis despois das goleadas conseguidas polos seus inmediatos perseguidores, Cerceda e Deportivo B, que despacharon, este venres, en partido adiantado, aos seus rivais Bertamiráns e Silva, con dous marcadores contundentes (5-0 en ambos os dous casos), que obrigan aos granates a sumar os tres puntos para non ver reducida a súa vantaxe a fronte da clasificación.
O partido será dirixido polo colexiado Fernando Formoso Sánchez (Ferrol), auxiliado nas bandas por Ricardo Landrove Lago e Alejandro Miño Pico.
Pero se para o Pontevedra son importantes os puntos en disputa, non o son menos para o seu adversario. O Laracha ocupa o último dos postos de permanencia, con só un punto de marxe sobre o descenso, o que lle converte nun rival perigoso, máis aínda se se ten en conta que, a pesar da súa mala clasificación, o conxunto que dirixe Ambrosio Oróns, no que levamos de 2015, unicamente perdeu un partido como visitante, despois de conseguir puntuar en campos tan complicados como o do Alondras, Rápido de Bouzas e ÿrdenes.
Aproveitando a festividade deste venres, os granates cambiaron lixeiramente os seus hábitos de adestramento, realizando a última sesión semanal pola mañá, no sintético da Xunqueira. Foi unha sesión na que, ademais dun intenso traballo, se puxo de manifesto o bo ambiente que reina entre equipo e cadro técnico. De feito, o ensaio finalizou cun cruzamento de apostas entre os xogadores e o adestrador, Luisito, que retou aos seus homes en lanzamentos dende o punto de penalti.
O que fallaba quedaba eliminado. Todos contra o técnico, que apostou 50 euros cos seus homes a que sería o vencedor. Non o logrou, pero, case demostrando que o olfacto de gol da súa época de dianteiro aínda lle permite manter unha excelente puntaría e un gran golpeo de balón coas dúas pernas. Anxo e Benja foron os que máis aguantaron o ritmo do técnico. O de Boiro foi o primeiro dos tres en fallar, pero logo Edu parou o lanzamento de Luisito, e como Benja non fallou, a ovación dos seus compañeiros foi grande, festexando ter gañado a aposta ao seu adestrador.
Luisito recupera a Kevin Presa pero perde a Mouriño, convocando os 18 xogadores dispoñibles
Finalizada a sesión, Luisito, como adoita facer nos partidos de casa, decidiu convocar a todos os xogadores dispoñibles, un total de 18 homes, dos que debe descartar dous instantes antes do partido. O técnico recupera a Kevin Presa, tras cumprir a súa sanción, pero perde a Mouriño, por acumulación de tarxetas.
Ademais, Capi e Pedro García seguen co proceso de recuperación das súas lesións musculares, mentres que a preocupación principal é o estado de Pablo Carnero, con molestias nas costas como consecuencia dun golpe recibido no partido ante o Boiro, se ben o xogador se mostraba confiado en poder estar en plenas condicións para xogar.