Caldas de Reis será escenario este domingo 22 de setembro da primeira edición da BTT Caldas Vila Termal.
Organizada polo Club Scornabiker en colaboración co Concello de Caldas de Reis, a proba deportiva contará con preto de 200 participantes propoñendo un roteiro circular polas pistas do Monte Xiabre con saída e chegada no centro da vila "amosando a beleza da paisaxe no municipio", explica o teniento de alcalde, Manuel Fariña.
Trátase dunha ruta de ciclismo de montaña non competitiva que partirá ás 9.00 horas da mañá desde a Rúa Real.
Deseñáronse dúas opcións, cun percorrido curto de 32 quilómetros e outro longo de 45 quilómetros e ao redor de 1.500 metros de desnivel acumulado positivo.
Unha proba que se estrea no calendario pero con ganas de consolidarse, e que encaixa á perfección na aposta do goberno local por modalidades e eventos deportivos que supoñan un foco de atracción para deportistas da comarca e de toda Galicia, á vez que pon en valor a riquiza natural e patrimonial de Caldas.