O Pavillón Paco Paz da cidade de Ourense foi escenario a fin de semana da estrea de tempada na Liga Galega de Formas de Boxeo.
O inicio non puido ser máis positivo para o Team Thunder de Marín, o máis numeroso en canto a representación cun total de 35 deportistas participantes.
Os novos púxiles, desde a categoría prebenxamín ata a cadete, enfrontáronse a unha competición na que demostraron a súa pericia en catro probas: corda, sombra, saco e manoplas.
No medalleiro marinense destacou o ouro de Laura Santiago en 15-16 anos, as pratas de David González en 15-16 e de Leo García en -8 anos e os bronces de Yohana Jiménez (15-16), Lucas Hermida (11-12), Martín Grandio (-8) e Sofía Soto (-8).
Tras esta cita, o Team Thunder xira agora a súa atención cara ao Campionato de España de Xóvenes que se disputará na localidade murciana de Los Alcázares e no que estará presente o seu púxil Amancio Martínez dentro da Selección Galega.