A localidade madrileña de Móstoles será o escenario onde o Poio Pescamar tentará conquistar a súa primeira Supercopa de España de fútbol sala feminino, os próximos 1 e 2 de febreiro de 2025.
O conxunto galego, sexto actualmente na clasificación de liga na tempada regular, terá a oportunidade de resarcirse da final perdida na edición anterior.
O torneo, que marca o primeiro título en xogo do ano 2025, reunirá a catro dos equipos máis potentes do fútbol sala nacional: CD Burela FS (actual campión da Primeira Iberdrola FS), Futsi Atlético Navalcarnero (subcampión), Melilla Cidade do Deporte Torreblanca (campión da Copa da Raíña) e Poio Pescamar.
Para o conxunto de Poio, esta cita representa unha oportunidade de ouro para sacarse a espiña da final perdida en febreiro de 2024 en Torremolinos, onde un solitario gol de Danny deu o título ao Burela nunha final moi igualada que se decidiu por un descoido defensivo.
Por primeira vez todos os partidos serán retransmitidos por Teledeporte, grazas ao acordo alcanzado entre a Real Federación Española de Fútbol e Radio Televisión Española.
Desde a Federación que preside Rafael Louzán cualifican esta retransmisión como "fito histórico para o fútbol sala feminino".