O fútbol sala, do mesmo xeito que o resto de deportes de contacto en Galicia, segue parado. Sen posibilidade de adestrar con normalidade, nin disputar partidos amigables e sen coñecer cando se iniciarán as competicións, as directivas de Leis e Poio Pescamar decidiron suspender o regreso dos seus xogadores aos adestramentos ata que se coñeza a data da primeira xornada de liga e se aprobe un protocolo que permita traballar a todos os clubs en igualdade de condicións.
O conxunto conserveiro xa acordara esta decisión a principios de agosto despois do primeiro aprazamento da Primeira División do fútbol sala feminino nacional. Agora é o Leis o que segue o mesmo camiño cun anuncio a través das súas redes sociais no que comunica aos seus seguidores que "apraza o inicio de pretemporada en todas as categorías ata que se estableza unha data de inicio de competición real, un protocolo seguro e unha cobertura legal válida para os clubs".
O cadro pontevedrés remarca que "para nós a saúde e seguridade dos integrantes do noso club é a única prioridade" polo que a volta ás canchas levará a cabo "cunha antelación de catro ou cinco semanas, unha vez coñecida a data de inicio de competición".
Pola súa banda, o presidente do Poio Pescamar, Juanjo García, confesa que o protocolo común para todos os deportes de contacto está proximo a aprobarse, de feito este venres, representantes de varias federacións reuniranse co COE para darlle o visto e prace a un documento transversal e imprescindible para o regreso do deporte en España.
"A nosa idea é empezar a adestrar antes do 10 de setembro e xa con contacto", revela García coa esperanza de que a pandemia permita cumprir os prazos previstos e iniciar a liga ao redor do 15 de outubro.
Mentres tanto, as integrantes do primeiro equipo rojillo mantéñense nos seus domicilios e realizando adestramentos individuais pola súa conta.