Primeira gran competición da tempada para o piragüismo nacional na súa modalidade olímpica de sprint.
Sevilla, concretamente o Centro Especializado de Alto Rendemento de Remo e Piragüismo La Cartuja, foi escenario a fin de semana o Campionato de España de Inverno para as categorías senior, sub-23, junior e máster.
Unha cita para ir collendo o ritmo competitivo e na que o piragüismo pontevedrés deixou o seu sinal.
A competición arrincou o sábado coas finais femininas de canoa, nas que a pontevedresa Antía Jácome, agora nas filas do Náutico Sevilla, colgou a medalla de prata no C-1 Sénior sendo soamente superada pola madrileña María Corbera.
O mesmo posto asinou outro olímpico da Boa Vila como Pablo Crespo, no seu caso competindo na categoría sub-23.
Ademais o podio sénior de C-1 masculino foi copado por deportistas de clubs da comarca. Noel Domínguez (Breogán do Grove) proclamouse campión de España superando a Jaime Duro (EP Ciudad de Pontevedra) e Adrián Sieiro (Náutico O Muiño), segundo e terceiro.
Subiron tamén ao podio Sara Durán (Confraría de Pescadores Portonovo) ao ser terceira no kaiak sub-23, Silvia Gago (Náutico O Muiño) cunha prata en categoría xuvenil e Marcos Terzado (Piragüismo Vilaboa) cun bronce no paracanoe.
En total participaron no Campionato de España de Inverno máis de 1.200 deportistas dun cento de clubs de todo o país.
