Novo curso e ilusións renovadas para o Tríatlon Rías Baixas, clube que vén de trasladar a súa sede a Pontevedra.
A entidade deportiva ten previsto estrear tempada o vindeiro sábado 12 de febreiro no IV Dúatlon Movéndonos por Poio, e farao cun plantel renovado na que destaca un nome, o de Pablo Dapena.
O campión do mundo de longa distancia "competirá baixo o noso escudo sempre que lle sexa posible", confirma o Rías Baixas sobre o pontevedrés, triatleta profesional enrolado nas filas do potente BMC.
Ademais de Dapena o club incorporou 18 deportistas, destacando unha sección feminina que contará cun bloque de 12 triatletas.
O obxectivo do Tríatlon Rías Baixas será ambicioso, e é que pretende mellorar no Ranking Nacional buscando o ascenso á Segunda División Masculina, todo iso sen esquecer a meta de consolidar a súa estrutura feminina e de promesas.
En canto ao dúatlon de Poio, serán 17 os seus deportistas presentes na cita que supoñerá o pistoletazo de saída á tempada.