Recuperados anímicamente do duro golpe sufrido o pasado domingo, os futbolistas e corpo técnico do Pontevedra céntranse xa no encontro do próximo sábado 6 de xuño (18:30 horas) no Campo Municipal José Camacho de Manzanares.
A principal preocupación para Luisito pasa por recuperar fisicamente dous futbolistas habituais nas súas aliñacións titulares, como son Pablo Carnero e Adrián Gómez.
No caso do lateral, a súa presenza en Ciudad Real antóllase complicada debido aos problemas musculares que o obrigaron a pedir o cambio antes de afrontar a prórroga ante o Mensajero.
Pola súa banda Carnero, que xogou minguado ante os canarios, sofre unha sobrecarga e a súa dispoñibilidade dependerá da evolución que mostre nos próximos días, se ben a súa presenza na convocatoria non está descartada.
No resto do plantel son varios os xogadores con molestias derivadas do esforzo físico do pasado domingo, pero a previsión é que se recuperen sen maiores complicacións.
Os que non chegarán seguro ao partido ante o Manzanares serán os lesionados Bruno e Benja. Ademais preocupa a situación de Mouriño e Kevin Presa, ao bordo da suspensión tras ver tarxeta amarela nos dous partidos de play-off disputados.
Tamén contará con baixas o conxunto manchego, que afrontou a volta ante o Lanzarote coas ausencias de Juanma e Santana, mentres Pirri se resentiu duns problemas musculares no quecemento no arquipélago, polo que é dúbida para o choque ante os granates.
Ademais Juanpe, Raúl Castillo e José Carlos regresaron tocados, pero Guillermo Alcázar espera contar con todos eles, ao igual que con Kevin Sedeño, que deu o susto en Lanzarote quedando inconsciente tras un choque e que tivo que pasar a noite en observación no hospital.
DESPRAZAMENTO DE AFECCIONADOS
O Pontevedra non estará só no José Camacho. Ao interese mostrado por moitos afeccionados en desprazarse en coches particulares, o club granate confirmou a organización dunha viaxe en autocar para os seus seguidores.
Terá un prezo de 30 euros (máis entrada) partindo dende a cidade de Lérez o venres ás 23:30 horas dende o Pavillón Municipal dos Deportes regresando tras o encontro.
Os prezos das entradas fixáronse en 15 euros para o público xeral e 10 para os bonificados (xubilados, mozos de 15 a 24 anos e mulleres), con desconto por venda anticipada, do que se beneficiarán os que viaxen no autocar, de 11 e 6 euros respectivamente. Os menores de 14 anos entrarán de balde.
O prazo para anotarse á viaxe organizada finaliza o xoves ás 19:00 horas.