Que tanto o Rápido de Bouzas como o Pontevedra tomáronse a semifinal de Cópaa Federación como un molesto trámite antes do partido do domingo próximo resultou evidente desde o momento en que ambos anunciaron as aliñacións iniciais. As afeccións deberon intuílo, porque entre a coincidencia coa xornada europea e o escaso interese do partido menos dun centenar de espectadores ocuparon a bancada do Baltasar Pujales.
Se Patxi Salinas fixo saltar ao campo a só catro dos xogadores titulares na última xornada ligueira, Luisito foi máis lonxe e no seu once inicial unicamente deu entrada a Jacobo Trigo, devolvéndoo á posición de central.
Deste xeito, coas "primeiras unidades" reservadas para mellor ocasión e máis importante obxectivo, pronto se puido comprobar que a "segunda unidade" visitante estaba por encima da aurinegra. A pesar diso, esa superioridade tardaron os de Luisito en traducila en ocasións. As súas chegadas á área morrían por falta de profundidade, mentres a ilusión e ganas do Rápido ían equilibrando forzas.
O primeiro aviso serio foi un disparo de Álex Fernández, desde a frontal, que saíu desviado (minuto 17). O Rápido tentábao defendéndose con orde, pero apenas chegaba a pisar a área de Santi Canedo, salvo nun disparo de Nando, á media volta desde o bordo da área (minuto 34), que o meta visitante mandou a corner con seguridade.
Pero a medida que avanzaban os minutos, as ganas do Rápido conseguiron neutralizar o dominio do Pontevedra, que cedeu metros e non se atopaba a gusto no sintético de Bouzas. A pesar diso, puido marcar nun centro de Miki, pero Álex Fernández rematou moi frouxo, ao centro da portería.
Sen máis nada que contar acabouse un primeiro tempo aburrido, con pouco fútbol, relativa igualdade, e escasas ocasións de perigo.
A segunda parte comezou movida. Se o Rápido puido marcar no primeiro minuto, cun disparo de Raúl que se marchou excesivamente cruzado, o Pontevedra acertaría pouco despois desde os once metros, ao transformar Javi Bonilla un penalti tan claro como innecesario de Pablo sobre Miki (minuto 49).
O Rápido acusou o gol recibido e o Pontevedra pasou a dominar, con gol anulado a Abel, por fóra de xogo. Pero cando parecía que o segundo gol visitante, unha contra local pillou descolocada á defensa granate, e Raúl, rematando de cabeza un excelente centro de Nando, puxo o empate no marcador.
Co partido aberto, sen dono nin control, Luisito recorreu á artillería, dando entrada a Mouriño e Mario Barco, pero o Rápido xa se lle subira ás barbas e nunha ben levada contra Carlos Pereira serve en bandexa para que Raúl adiante aos locais, en xusto mérito á súa loita no partido.
Claro que a alegría durou pouco ao equipo de Bouzas. Apenas un minuto despois Mario Barco devolvía a igualdade, tras un remate que dá en Pablo, despistando ao seu porteiro.
Mateu puido marcar a falta de cinco minutos, pero o seu disparo foise a corner tras dar nun defensa. Logo intentos sen demasiado perigo, ata que a lotería dos penaltis tocoulle ao Pontevedra, que transformou os seus cinco lanzamentos por medio de Javi Bonilla, Kevin Presa, Mateu, Abel e Mouriño, mentres que polo Rápido Santi Canedo detivo o primeiro lanzamento de Carlos Pereira, marcando Isidro, Diz e Juanma, non sendo necesario efectuar o último lanzamento, ao facer pleno os granates.
CLUB RÁPIDO DE BOUZAS (2+3): Aarón; Isidro, Portas (Jesús Varela, minuto 46), Chisco, Pablo; Nico (Juanma, minuto 64), Rocha, Iago Paz (Raúl, minuto 46), Pardavila (Carlos Pereira, minuto 64); Nando (Hugo, minuto 83) e Diz.
PONTEVEDRA CF (2+5): Santi Canedo; Adrián, Portela (Javi Bonilla, minuto 46), Jacobo Trigo (Kevin Presa, minuto 46)., Bruno; Gonzalo (Mouriño, minuto 70), Abel; Miki, Álex Fernández, Álex González (Mario Barco, minuto 73); e Mateu.
Árbitro: José Luis González (Pontevedra), auxiliado nas bandas por Alberto Lorenzo e Eduardo Ribera. Amoestou a Gonzalo e Jacobo Trigo, polo Pontevedra.
Goles: (0-1) Minuto 49: Javi Bonilla, de penalti. (1-1) Minuto 69: Raúl. (1-2) Minuto 78: Raúl. (2-2) Minuto 79: Mario Barco.
Incidencias: Campo Baltasar Pujales (Bouzas-Vigo). Partido correspondente ás Semifinais de Copa RFEF. Uns 75 espectadores. O Pontevedra disputará a final autonómica fronte ao Arosa.
O AROSA Á FINAL TRAS VENCER EN CERCEDA
Pouco antes de terminar o partido no Baltasar Pujales chegaba a noticia da clasificación do Arosa para a final, tras superar ao Cerceda no seu campo de O Roxo, por 1-2.
Os de Jorge Otero adiantáronse con dous goles conseguidos por Carlos e Rivas, reducindo os locais na segunda parte, pero sen conseguir neutralizar a renda visitante.