Non puido ser. Jean Marie Okutu non estará na final olímpica de salto de lonxitude tras finalizar na vixésima praza a cualificación.
O atleta marinense quedou a 10 centímetros de entrar entre os 12 mellores, que pelexarán polas medallas, cun mellor salto, o seu primeiro intento, de 7,75 metros.
Lonxe quedaba a marca de pase automático á final, 8,15 metros, a mesma que tivo que saltar Okutu (logrou 8,17 metros) para chegar a Río.
O seu primeiro salto foi de 7,75 metros, o segundo de 7,72 metros e no último e definitivo tampouco puido mellorar con 7,53 metros.
A pesar de non lograr o obxectivo de estar na final, a experiencia pode cualificarse de positiva para Jean Marie, na que supón a súa primeira participación nuns Xogos Olímpicos.