Dura derrota para a Sociedad Deportiva Teucro na súa visita ao San Pablo Burgos. O conxunto pontevedrés, que chegaba xusto de rotación ao duelo, pelexou ata final chegando a igualar un marcador de seis goles en contra no momento decisivo, pero nos dous minutos finais fraqueáronlle as pernas e cedeu un 25-22.
As fortes defensas e a escasa repartición de golpes foron protagonistas durante os primeiros instantes de xogo, nos que nin Burgos nin Teucro foron capaces de irse en máis dun tanto de distancia (min. 8, 4-3).
Acendéronse as alarmas no conxunto pontevedrés no seu seguinte ataque. Vinicius fíxose dano nun nocello e tivo que retirarse lesionado, deixando ao Teucro, que xa chegaba escaso de rotación á cita, cun xogador menos para o que restaba de duelo. Nese momento produciuse un punto de inflexión no que os visitantes empezaron a cometer erros non forzados que Burgos non desaproveitou, anotando un parcial de 2-0 que obrigaba a Irene Vilaboa a parar o tempo (min. 12, 6-3).
A defensa e a portería burgalesa seguía impenetrable. Só Ricardo González desde os sete metros foi capaz de frear a seca de Teucro, que levaba máis de 8 minutos sen ver portería. Con todo, a colocación do lanzamento dos xogadores locais poñía terra polo medio en cada ataque ata facerse cunha renda de ata 5 goles a 10 minutos de chegar ao descanso (11-6).
Anotou Gonçalo o sétimo gol para os azuis no previo ataque dun novo accidente no Plantío. Co 11-7 entrou Marcos González para disputar a súa primeira acción do partido, pero nunha xogada desafortunada con Dzokic fíxose dano e tivo que retirarse en padiola acompañado dos servizos de emerxencia.
Cambiou a formulación Irene Vilaboa cun 5-1 en defensa con Gonçalo adiantado, dando coa tecla a adestradora visitante para frear tres ataques consecutivos de Burgos. Con todo, o Teucro non foi capaz de reducir distancias no marcador e chegouse ao descanso cun 14-9.
Os primeiros doce minutos do segundo acto foron de máxima igualdade, mantiveron o 6-0 defensivo tanto locais como visitantes e repartiron golpes en ambas as escuadras os dous conxuntos, ata que Martín Davila errou o seu lanzamento desde os sete metros e Burgos aproveitou para hacese coa máxima renda ata o momento (18-12).
Pero os locais baixaron o nivel nun visto e non visto, Teucro meteu a Kilian Villaverde baixo paus e rexurdiu para manter vivo ao seu equipo ata o final, que obrou unha épica remontada ata colocarse a un gol do empate (22-21).
Parou o tempo o técnico burgalés e o seu equipo reaccionou no momento decisivo, interceptando o balón en senllas chegadas dos azuis a área rival para penalizar en forma de tres contragolpes seguidos cando as forzas xa se desvaneceron por completo.
Finalmente, 25-22 e derrota para un Teucro que pelexou ata que lle fraquearon as pernas.