As instalacións da Fundación Rías Do Sur en Pontemuiños acolleron cun cheo total nas bancadas o Campionato Galego de Base de Natación Sincronizada, nas modalidades de rutinas de equipo e combinadas, organizado polo Club Galaico Sincro.
A gran afluencia de equipos participantes serviu para constatar o auxe constante desta modalidade deportiva, na que a sincronizada de base representa a antesala da máxima categoría e serve para establecer unha importante proxección sobre o futuro deste deporte.
Nunha competición na que o elemento máis destacable era a curta idade dos seus participantes, moitas das cales contaban con só sete anos de idade, as habilidades das nadadoras fixeron as delicias dos asistentes loitando polas medallas, cuxa entrega correu a cargo de Anxos Riveiro, concelleira de Cultura e Deportes do Concello de Pontevedra, e Ángeles Lorenzo, vicepresidenta da Federación Galega de Natación.
Por clubs, sobresaen os resultados conseguidos polo Club Sincronizada Ourense que obtivo un gran número dos pódiums en disputa, e os clubs lerezanos Club Natación Sincronizada Pontevedra e Club Galaico Sincro, con medalla de ouro na categoría Base III, desde a que se accede á categoría de nivel, na modalidade de combinada, cunha destacada actuación da súa nadadora Mercedes Domínguez Del Campo.