O Club Cisne Balonmán xa ten substituto para encher o oco que deixará a marcha do canteirán Carlos Álvarez rumbo ao Ademar de León.
Trátase de Alberto Delgado, un dos grandes talentos nacionais mozos e que se compromete co club pontevedrés para as tres próximas tempadas.
Así o confirmou o club no que se formou, o Km13 Balonmano Gáldar, afirmando que "a pesar da multitude de ofertas recibidas, algunhas delas de clubs importantes dentro do panorama nacional, Alberto quixo seleccionar un destino que lle permita afrontar adecuadamente os seus estudos universitarios".
O extremo dereito canario militou a última tempada en Primeira Nacional co Gáldar, visitando de feito Pontevedra para medirse co outro club da cidade, o Teucro. É ademais internacional xuvenil na Selección Española adestrada polo ex-preparador cisneísta Javier Fenández 'Jabato'.
Con Alberto Delgado son xa dous os xogadores confirmados para a próxima tempada no Cisne, tras a anunciada renovación do extremo esquerdo Mateo Arias.