O Estadio Municipal de Pasarón contará para sempre ao seu lado con Eduardo Dapena Lis 'Cholo', o seu eterno capitán e lenda do 'Hai Que Roelo'.
Desde o centro do terreo de xogo o que era tamén presidente de honra da entidade, falecido o pasado 27 de marzo aos 88 anos de idade, seguirá empuxando ao equipo dos seus amores, e é que alí repousan desde este xoves parte das súas cinzas.
Foi un acto sinxelo, ao que só asistiron os seus familiares máis próximos e a presidenta granate, Lupe Murillo, celebrado a última hora da tarde.
Unha homenaxe sentida e merecida a unha figura que se converteu en símbolo de xeracións defendendo en 300 partidos de liga a elástica granate coincidindo coa época de maior éxito da súa historia.