Pontevedra Club de Fútbol e Arosa SC teñen esta fin de semana citas importantes en liga, visitando o primeiro ao Real Avilés e o segundo recibindo na casa o Salamanca, pero no horizonte para ambos os dous empeza a asomar o esperado derbi provincial.
O encontro de rivalidade local, que se puido vivir no recente periplo dos granates pola Terceira División, non se dá na Segunda B ou actual Segunda RFEF desde a campaña 93-94, na que o resultado nos dous choques foi de triunfo visitante por 1-2.
Nesta ocasión o derbi xa ten data e hora confirmada, tal e como aparece reflectido no calendario oficial da Real Federación Española de Fútbol.
Esa data será no horario preferido dos dous, o domingo ás 17.00 horas, concretamente o día 28 de novembro no Estadio Municipal de Pasarón.
Para o que aínda haberá que esperar uns días, ata que pase a xornada previa pendente, será para coñecer os prezos fixados polo Pontevedra para o partido, ao esperarse unha importante presenza de afeccionados arosistas nas bancadas do coliseo granate.