Co seu debut na División de Honra xa ao virar a esquina, o Club Bádminton Ravachol Pontevedra confirmou o seu último movemento para dar por pechado o plantel co que debutará este curso na máxima categoría.
A última incorporación dos pontevedreses é o ourensán Martín Barbado, procedente do club Athlos de Ourense, que chega para pechar un plantel masculino "de garantías", aseguran desde o club, no que xa se atopaban os renovados Álex Nogueira, Manuel Brea, Gabriel Fernández, Pablo Sanmartín, Miguel Serrano e os fichados David King e Luke Pearce.
A eles súmanse Ana Carbón, Raquel Miguens, Noelia Gestoso, María Torres e as tamén fichadas Georgina Bland e Ania Setién no equipo feminino.
Segundo destaca o Ravachol o seu novo xogador acumula unha ampla traxectoria deportiva con 5 títulos de campión galego no seu palmarés e 4 medallas en campionatos de España.
Pechado plamtel, o primeiro equipo céntrase xa na recta final de adestramentos antes de que de inicio a tempada de maneira oficial coa primeira xornada de liga, prevista para o próximo día 5 de setembro en Valencia fronte ao CB San Fernando, se as condicións sanitarias o permiten.