En plenas datas do Nadal, o fútbol non dá tregua. Despois dunha semana de descanso, os equipos de 2ª RFEF volven ao traballo. Un dos máis madrugadores é o Arosa, que ten prevista para esta tarde, ás 16.30 horas no campo de Vilaxoán, a súa primeira sesión de adestramento para preparar o partido do 9 de xaneiro fronte ao Bergantiños en Carballo para pechar a primeira volta de competición.
Con todo, antes de saltar ao céspede todos os integrantes do primeiro equipo e do corpo técnico deberán someterse a unha proba de antíxenos para comprobar que non haxa contagios despois do parón do Nadal en plena escalada da incidencia de casos de covid-19.
Se todos están sans, poderán poñerse ás ordes de Jorge Otero, que someterá aos seus xogadores a outra proba igual de molesta: a báscula.
Pero non só a pandemia e o estado físico do plantel preocupa no Arosa. As lesións de longa duración sufridas ao longo da primeira volta, Álex Cobo e Róber, fan que a dirección deportiva, que encabeza o pontevedrés Rafa Sáez, permaneza moi atenta ás oportunidades que poida ofrecer o mercado. Con todo, o cadro arlequinado ten ocupadas todas as súas fichas sénior, polo que as chegadas quedarán supeditadas á saída dalgún dos xogadores con menos minutos ou á incorporación de xogadores sub 23.
Reforzos cos que se conta para este regreso aos adestramentos son os de Porrúa e Campillo, que se perderon por lesión os últimos partidos do equipo.