Vive momentos convulsos a Sociedad Deportiva Teucro, no aspecto deportivo e tamén no extradeportivo.
Despois de anunciar a saída do equipo de Natan Suárez, por sorpresa e a piques de disputar un encontro en Benidorm, o central catalán tardou poucas horas en atopar acomodo na Liga Asobal.
Suárez asinou polo Cuenca, rival teucrista na máxima categoría, provocando certo malestar na contorna do equipo, que non entende o sucedido.
O Teucro xustificou a través dun breve comunicado que se lle daba a baixa federativa por "problemas familiares", un argumento que agora quedou en dúbida.
O que si é seguro é que a directiva da entidade pontevedresa afronta unhas semanas de intensa actividade co obxectivo de reforzar ao primeiro plantel, ante a saída do propio Natan e a esperada de Dani Hernández.