Jéssica Bouzas despídese de Indian Wells tras un maratón de case tres horas contra Anastasia Potapova

O Salnés
07 de marzo 2025
Actualizado: 12:07

A tenista arousá, que debutaba no cadro final do considerado como 'quinto grande' do circuíto, puxo contra as cordas á número 34 do mundo pero terminou cedendo en tres sets

Jéssica Bouzas adestrando con España na Billie Jean King Cup
Jéssica Bouzas adestrando con España na Billie Jean King Cup RFET

Cos dedos rozou Jéssica Bouzas o pase a segunda rolda do WTA 1.000 de Indian Wells, en California.

Era o debut da arousá no cadro principal do considerado 'quinto grande' do circuíto, ao que chegaba como a 57 raqueta do ranking WTA.

A súa rival era a rusa Anastasia Potapova, que ocupa e posto 34 na clasificación mundial, e o certo é que o partido arrincou favorable aos intereses da tenista de Vilagarcía.

Seu foi o primeiro parcial, decidido no desempate por un apertado 7-6 (5).

Con todo Bouzas tiña problemas para aguantar o seu servizo (sufriu sete roturas) e escapóuselle o segundo set por 4-6.

Xa na terceira e definitiva manga Jéssica chegou a dominar por 5-3, gozando dun saque para pechar o partido, pero nese momento Potapova encadeou catro xogos consecutivos para culminar a súa remontada cun 5-7.

Todo en nin máis nin menos que 2 horas e 41 minutos de intensa batalla nas pistas do Tennis Garden.

O de Indan Wells era o terceiro torneo de categoría WTA 1.000 da tempada.