A actividade tenística tómase un respiro no Círculo Cultutal Deportivo (CCD) de Sanxenxo tras dúas intensas semanas de emocionante competición internacional.
Primeiro foi o seu clásico Torneo ITF Júnior, e os últimos días deulle continuidade o Internacional Cadete.
A categoría masculina contou con triunfo nacional, ao vencer o mallorquino Marc Navarro.
O deportista balear tombou na final o suízo Alexander Groet, que apenas puido reaccionar ante a intensidade do seu rival. O partido pechouse de feito cun claro 6-0 e 6-2.
Navarro fixo dobrete en Sanxenxo, xa que tamén levou a final de dobres masculino disputada o venres, facendo parella co madrileño Pablo Martín.
Pola súa banda no cadro feminino a gran protagonista foi a tenista británica Sofía Tatu.
A inglesa xogaba a gran final contra a portuguesa Matilde Novaís nun partido que tivo que decidirse en tres sets. Eran a cabeza de serie número 1 e o número 2 do torneo.
Tatu fixo valer a súa condición de favorita cun tenteo de 6-2, 4-6 e 6-4.