Ten claro o Pontevedra que "se queremos estar aí non queda outra que gañar" no difícil campo de Merkatondoa.
Refírese Luisito ao partido que este domingo (17:00 horas) afrontan os granates no campo do Izarra, equipo recentemente ascendido que marcha nunha cómoda posición na táboa (undécimo) grazas á súa fortaleza como local.
No seu estadio o cadro navarro só perdeu dous partidos (Celta B e Somozas) e só encaixou a ridícula cifra de tres goles, o que demostra que "son un equipo durísimo no seu campo", defende o técnico do equipo pontevedrés.
Luisito deixou fóra da convocatoria a Hugo, Adrián e Tomás
Romper a muralla defensiva local será por tanto un dos aspectos craves do partido. Para conseguilo Luisito introduciu novidades nunha convocatoria á que volve Company e da que caen Hugo, Adrián e Tomás, ademais dos lesionados Pablo Carnero e Capi e de Adrián Mouriño, que será operado o luns.
Desta forma a lista de 16 compóñena: Edu, Company, Miguel, Verdú, Pablo, Bruno, Kevin, Jandrín, Álex Fernández, Borjas, Jacobo, Anxo, Queijeiro, Pedro García, Bello e Campillo.
O árbitro do encontro será Óscar Sauleda Torrent, do colexio territorial catalán.