Foi todo no atletismo, subcampioa mundial e até catro veces olímpica (Atlanta 96, Sidney 2000, Atenas 2004 e Pequín 2008), e aínda así nin co paso dos anos perdeu as ganas de achegar ao seu deporte.
Así foi de feito até o último día, e é que Felicia Tilea-Moldovan deu unha última lección até despois de falecer.
A atleta de orixe romanesa, fincada en Pontevedra desde principios dos anos 2000, expresou antes de morrer o seu desexo de doar todo o material deportivo que utilizaba a diario ao Club Atletismo Rías Baixas.
"É un almacén cheo", recoñeceu este xoves Gonzalo Méndez, responsable do Rías Baixas, na homenaxe que o club pontevedrés quixo brindar a Felicia desde a pista de atletismo do Centro Galego de Tecnificación Deportiva, na que tantas veces adestrou.
"Foi unha sorpresa moi grande, aínda que tiñamos unha relación enorme", explica Méndez recoñecendo que "imos utilizalo todo cos nenos e nenas das escolas".
O adestrador de atletismo pontevedrés encomiou a vitalidade e bo carácter dunha atleta que, a pesar de ser medallista internacional, sempre se mostrou próxima e accesible. "Era alguén superespecial, discreta, desas persoas que perduran para sempre no recordo", afirmou lamentando que en Pontevedra "non soubemos aproveitar" a súa experiencia e coñecementos.
"Levaba tres anos xa soportando un cancro de páncreas e foi súper valente, vindo aquí a axudar coa xente nova e igual que na súa casa que tamén ten un ximnasio e facía actividade alí cos veciños de Bértola", lembrou Gonzalo Méndez.